मुंबई : अजित पवारांच्या बंडामुळे राष्ट्रवादीत फुट पडली आहे. पण तरीही दोन्ही गटातल्या नेत्यांचे चांगले संबंध आहेत. अशात विधानसभेच्या पायऱ्यांवर अमोल मिटकरी आणि जयंत पाटील समोरासमोर आले. यावेळी अमोल मिटकरी जयंत पाटलांच्या पाया पडले. यावेळी आमदार रोहित पवार हेसुद्धा उपस्थित होते. यावळी जयंत पाटलांनी त्यांना कानमंत्र दिला आहे. हा व्हिडिओ सोशल मीडियावर चांगलाच व्हायरल झाला आहे.

दरम्यान, आज विधानसभेच्या पावसाळी अधिवेशनाचा दुसरा दिवस आहे. यावेळी विधानपरिषदेत किरीट सोमय्या यांच्या कथित व्हिडिओ प्रकरणी मोठा गदारोळ पाहायला मिळाला. विधापरिषदेचे विरोधीपक्षनेते अंबादास दानवे यांनी सभागृहात सभापतींकडे तब्बल ८ तासांच्या व्हिडिओचा पेन ड्राईव्ह सुपूर्द केला आहे.

त्याचबरोबर शिवसेना उद्धव बाळासाहेब ठाकरे गटाचे आमदार भास्कर जाधव यांनी मुख्यमंत्री एकनाथ शिंदे यांच्यावर सभागृहात जोरदार निशाणा साधला आहे. एकनाथ शिंदे यांनी माझ्या मतदारसंघातील अपघातात मृत्यू झालेल्यांच्या कुटुंबियांना मदत केली नाही असा आरोप भास्कर जाधव यांनी केला आहे.

आम्ही शेतकऱ्यांसाठी खूप काही केलं हे दाखवण्यासाठी आणि शेतकऱ्यांना केंद्रस्थानी ठेवून २९३ चा प्रस्ताव आणला गेला असा आरोप काँग्रेसचे नेते विजय वडेट्टीवार विधानसभेच्या सभागृहात यांनी केला.