गेल्या काही दिवसांमध्ये शिवप्रतिष्ठान हिंदुस्तानचे संस्थापक संभाजी भिडे यांच्या वादग्रस्त वक्तव्यांमुळे राज्यातील राजकीय वातावरण तापलं आहे. भिडे यांच्यावर कारवाई करण्याची मागणी राज्यभरातून केली जात आहे. तर संभाजी भिडे वादग्रस्त वक्तव्याप्रकरणी काल विधानसभेत आणि विधान परिषदेत विरोधक आक्रमक झाल्याचे दिसुन आले. तर राज्यातील सरकार त्यांना पाठिशी घालत असल्याचा आरोप विरोधकांनी केला आहे. तर त्यांच्यावर गुन्हा दाखल करण्याची मागणी जोर धरू लागली होती. अखेर या संदर्भात हालचाली सुरू करण्यात आल्या आहेत.

अमरावतीमध्ये 27 जुलै रोजी महापुरुषांबाबत वादग्रस्त वक्तव्याच्या ऑडिओ फॉरेन्सिक तपासणीसाठी पाठवण्यात येणार आहे. तर राजापेठ पोलिसांनी संभाजी भिडे व आयोजकांना नोटीस जारी केली आहे. त्याचबरोबर संभाजी भिडे यांना 8 दिवसात अमरावती पोलिसांसमोर हजर राहण्याचे आदेशही देण्यात आले आहेत.

संभाजी भिडे यांना दाखल गुन्ह्याच्या अनुषंगाने त्यांचं म्हणणं मांडण्याची सूचना या पत्राद्वारे करण्यात आली आहे. त्यामुळे 8 दिवसात संभाजी भिडे अमरावती पोलिसांकडे हजर राहणार का? आणि आपली बाजु मांडणार का? याकडे लक्ष लागलं आहे. तर याच संदर्भात राज्यात ज्या ठिकाणी भिडेंवर गुन्हे दाखल झाले, त्या ठिकाणचे गुन्हे अमरावतीत वर्ग करण्यात आल्याची माहिती पोलिस आयुक्त नवीनचंद्र रेड्डी यांनी दिली आहे.

काय आहे संपुर्ण प्रकरण?

संभाजी भिडे यांनी 27 जुलै रोजी एका मंगल कार्यालयात जाहीर सभा झाली होती. त्यादरम्यान त्यांनी महापुरुषांबाबत वादग्रस्त विधान करुन व लोकांमध्ये असंतोष पसरवून विविध समाजघटकांमध्ये वाद वाढवणारे भाष्य केलं. त्याचबरोबर देशातील महापुरुषांची बदनामी केली. या तक्रारीवरून राजापेठ पोलिसांनी संभाजी भिडे, निशांतसिंह जोध, अविनाश मरकल्ले व इतरांविरुद्ध गुन्हा दाखल केला होता. त्या गुन्ह्याच्या अनुषंगाने संभाजी भिडे यांना नोटीस जारी करण्यात आली आहे. ती त्यांच्यापर्यंत पोहोचली आहे.