अमरावतीः आमदार रवी राणा यांनी बच्चू कडू यांच्यावर खोके घेतल्याचा आरोप केला होता. या गंभीर आरोपानंतर राज्याचं राजकारण ढवळून निघालं होतं. राणांच्या आरोपांना आज आमदार बच्चू कडू यांनी सणसणीत उत्तर दिलं आहे.

अमरावती येथे आयोजित मेळाव्यात आमदार बच्चू कडू बोलत होते. आज ते भूमिका जाहीर करणार असल्याने राज्याचं लक्ष त्यांच्याकडे लागून राहिलं होतं. यावेळी बोलतांना आमदार कडू म्हणाले की, आरोप करणाऱ्यांची पहिलीच वेळ आहे म्हणून माफ करतो, इथून पुढं आमच्या वाट्याला गेलात तर सोडणार नाही; असा इशारा बच्चू कडू यांना रवी राणा यांना दिला.

बच्चू कडू पुढे म्हणाले की, आम्हीही आमच्या बाजूने अपशब्द बोलणार नाही, आचारसंहिता पाळू. पण समोरुनही नियम पाळले गेले पाहिजेत. आम्ही आजपर्यंत उपेक्षितांसाठी काम केलं आहे. सत्ता असो वा नसो कधीच फरक पडत नाही. राज्यमंत्री असतांना ११८२ बैठका घेतल्या. कामगाराच्या फक्त मेसेजवर मीटिंग लावल्या आहेत. त्यामुळे आमच्यामागे लोकांचं प्रेम आहे.

''येत्या काळात सत्तेच्या दोऱ्या आपल्या हातात पाहिजेत. आपण म्हणू तशी सत्ता हलली पाहिजे. त्यासाठी आपल्या विचारांचे लोक वाढले पाहिजेत. त्यासाठी प्रयत्न करु'' असं म्हणत बच्चू कडू यांनी मेळाव्याला संबोधीत केले.