Anna Hazare: महाराष्ट्र विधान परिषदेत लोकायुक्त विधेयक मंजूर झाल्यानंतर महाराष्ट्राचे मुख्यमंत्री एकनाथ शिंदे यांनी शुक्रवारी सामाजिक कार्यकर्ते अण्णा हजारे यांच्याशी फोनवर चर्चा केली. हे विधेयक मंजूर केल्याबद्दल अण्णा हजारे यांनी मुख्यमंत्री एकनाथ शिंदे यांचे आभार मानले आहेत. दरम्या अण्णा हजारे यांची प्रतिक्रिया समोर आली आहे. त्यांनी ठाकरे सरकारला टोला लगावला आहे.

मागील अधिवेशनात प्रलंबित राहीलेलं लोकायुक्त विधेयक विधानपरिषदेत मंजूर करण्यात आलं आहे. त्यामुळे समाजसेवक अण्णा हजारे यांनी राज्य सरकारचे आभार मानले. ठाकरे सरकारने केवळ आश्वासन दिलं पण कायदा केला नाही, असा टोला देखील अण्णा हजारे यांनी लगावला.

ठाकरे सरकारला लोकायुक्त कायदा नको होता. देवेंद्र फडणवीस यांनी वेळ लावला पण कायदा केला, असे अण्णा हजारे म्हणाले.

हे विधेयक मंजूर झाल्याने सर्वसामान्यांना दिलासा मिळेल आणि भ्रष्टाचाराला आळा बसेल, असा विश्वास अण्णा हजारे यांनी व्यक्त केला. या जनहित विधेयकाच्या मार्गात येणारे सर्व अडथळे दूर करून ते मंजूर करण्यात आल्याचे शिंदे यांनी सांगितले.