Supriya Sule: महाराष्ट्रातील अनेक उद्योग गुजरातला हलवण्यात येत आहेत. राज्यात एकनाथ शिंदे आणि देवेंद्र फडणवीस यांचे सरकार आल्यानंतर अनेक मोठे औद्योगिक प्रकल्प महाराष्ट्रातून गुजरातमध्ये स्थलांतरित झाले. यावरुन सत्ताधारी पक्ष आणि विरोधकांमध्ये महाराष्ट्राच्या औद्योगिक घसरणीवरून वाद निर्माण झाला आहे.

दरम्यान पुन्हा एकदा मुंबईतील हिरे उद्योग गुजरातला जात आहे. त्यामुळे राष्ट्रवादी काँग्रेसच्या खासदा सुप्रीया सुळे संतापल्या आहेत.

सुप्रिया सुळे म्हणाल्या, "मुंबईतील हिरे उद्योग आता पुर्णपणे गुजरातला जात आहे. सुरत डायमंड बोर्स या इमारतीत अनेक हिरे व्यापारी स्थलांतरित होत आहेत. महाराष्ट्रातून आणखी एक महत्त्वाचा उद्योग बाहेर चालला असून मुंबईचे महत्त्व कमी करण्याचा भाजप कडून सातत्याने प्रयत्न होत आहे."

"राज्याच्या मुख्यमंत्र्यांनी आपले उद्योग धोरण कुठे चुकतेय यांचा आढावा घेणे आवश्यक आहे. सरकारच्या या अशा कचखाऊ वृत्तीमुळे या राज्यातीर तरुणांच्या हक्काचा रोजगार राज्याबाहेर जात ही खेदाची बाब आहे", असे खासदार सुप्रिया सुळे म्हणाल्या.

यापूर्वी राज्यातून वेदांता, टाटा एअरबस सी २९५, सॅफ्रन व बल्क ड्रग पार्क हे मोठे उद्योग गेले. विद्यमान सरकारमुळे दुसऱ्या राज्यात गेल्याचा आरोप विरोधकांनी केला होता. (Latest Marathi News)