शिरपूर : शिरपूर जैन येथील रहिवासी व अकोला येथे दोघे पतीपत्नी लेडी हार्डिंग येथे परिचारक या पदावर कार्यरत असलेले सुशीलकुमार दिलीप थोरात (४०) हे आपल्या पत्नी व मुलीसह शिर्डीला देव दर्शनासाठी गेले होते. मात्र अकोला येथे परत येत असताना त्यांचे कारवरील नियंत्रण सुटल्याने कारचा अपघात होऊन सुशील थोरात यांचा जागीच मृत्यू झाला.

सुशीलकुमार यांची पत्नी व पाच वर्षाची मुलगी ही सुदैवाने बचावली आहे. सदर अपघात करमाड पोलीस स्टेशन हद्दीत असलेल्या जयपूर – भांबरडा (जि.संभाजीनगर) शिवारात ०३ जुलै २०२३ रोजी सकाळी ४ वाजताच्या सुमारास घडला. स्विफ्ट कार क्र. एम.एच.३० बी.बी. ९७९३ महामार्गाच्या खाली ३० फुट खाली कोसळली. एखादा कागद उडावा अशी कार हवेत उडून कोसळली. अपघातामध्ये कारचा अक्षरशः चेंदामेंदा झाला आहे.

अपघाताच्या आवाजाने भाम्बर्डा येथील नागरिकांनी घटनास्थळी धाव घेवून व करमाड पोलिसांना कळवले. पोलिसांनी घटना स्थळी भेट देऊन जागीच ठार झालेले सुशीलकुमार थोरात यांचा पार्थिव देह उत्तरीय तपासणीसाठी पाठविला.व जखमीं पत्नी बबिता वय ३४ व मुलगी अद्वितीय वय ५ वर्ष यांना उपचारासाठी संभाजी नगर येथे हलवले. सुशील थोरात यांच्या पश्चात पत्नी, मुलगी, आई, वडील, भाऊ भावजय असा आप्त परिवार आहे.