Archana Patil Chakurkar Join BJP : काँग्रेसचे ज्येष्ठ नेते आणि माजी केंद्रीय गृहमंत्री शिवराज पाटील यांची सून अर्चना पाटील चाकूरकर यांनी भाजप नेते आणि उपमुख्यमंत्री देवेंद्र फडणवीस यांची भेट घेतली होती. त्यानंतर आज त्यांनी मुंबईत भाजपमध्ये प्रवेश केला. यावेळी उपमुख्यमंत्री देवेंद्र फडणवीस, चंद्रशेखर बावनकुळे इत्यादी पक्षाचे नेते उपस्थित होते.

लोकसभा निवडणुका जवळ येत असताना राज्यात राजकीय हलचालींना वेग आल्याचे पाहायला मिळत आहे. काही दिवसांपूर्वी राज्यसभा खासदार अशोक चव्हाण यांच्या मध्यस्थीने काँग्रेसचे आणखी एक नेते भाजपमध्ये प्रवेश करू शकतात असे सांगितले जात होते. मराठवाड्यातील नेते अशोक चव्हाण यांनी भाजपमध्ये प्रवेश केल्यानंतर मराठवाड्यातील काँग्रेस कार्यकर्त्यांमध्ये अस्वस्थता असल्याची देखील चर्चा होती. त्यानंतर काल अर्चना पाटील चाकूरकर यांनी देवेंद्र फडणवीस यांची भेट घेतली. त्यानंतर आज हा पक्ष प्रवेश पार पडला आहे. काँग्रेसमधून नुकतेच भाजपमध्ये दाखल झालेले अशोक चव्हाण यांनी पक्षप्रवेशासाठी मध्यस्थी केल्याचे वृत्त आहे.

दरम्यान पाच वर्षांपूर्वीच डॉ. अर्चना चाकूरकर यांना भाजपमध्ये सामील होण्याची ऑफर देण्यात आली होती. मात्र काही कारणांनी त्यांनी ही ऑफर नाकारली होती. अर्चना पाटील भाजपमध्ये सहभागी झाल्याने महाराष्ट्र काँग्रेसला मोठा धक्का बसला आहे. यापूर्वी अनेक बड्या काँग्रेस नेत्यांनी पक्षाला रामराम केला आहे.

महाराष्ट्रातील दिग्गज नेते आणि दोनदा मुख्यमंत्री राहिलेले अशोक चव्हाण फेब्रुवारी २०२४ मध्ये पक्षातून बाहेर पडले, त्यांनी नंतर भाजपमध्ये प्रवेश केला. माजी खासदार मिलिंद देवरा यांनी देखील काँग्रेस पक्षासोबतचं आपलं नातं संपवून महाराष्ट्राचे मुख्यमंत्री एकनाथ शिंदेंच्या शिवसेनेत सहभागी होण्याचा निर्णय घेतला. यासोबतच बाबा सिद्दीकी यांनी देखील ८ फेब्रुवारी रोजी काँग्रेस सोडून अजित पवारांच्या राष्ट्रवादीची वाट धरली. त्यामुळ काँग्रेस पक्षाला मागील काही दिवसात मोठे धक्के सहन करावे लागले आहेत. याचा मोठा फटका काँग्रेसला आगामी लोकसभा निवडणूकीत पाहायला मिळू शकतो.