मुंबई : कर्नाटक उच्च न्यायालयाने हिजाबबंदीविरोधात याचिका फेटाळून लावल्या आहेत. तसेच शैक्षणिक संस्थांमध्ये हिजाबबंदी (Karnataka High Court Hijab Row Judgement) योग्यच आहे, असा निकाल न्यायालयानं दिला आहे. त्यावर अॅड. असीम सरोदे (Asim Sarode) यांनी प्रतिक्रिया दिली आहे. हिजाब घालणे हा धार्मिक स्वातंत्र्यांचा भाग नाही हे संवैधानिक सत्य आता आपण सर्वांनी स्वीकारले पाहिजे, असं सरोदे म्हणाले

''हिजाब बंदी योग्य आहे. शाळा महाविद्यालयांमध्ये हिजाब घालण्याची परवानगी नाकारली जाणे योग्य आहे. कर्नाटक उच्च न्यायालयाने अत्यंत महत्वाचा निर्णय दिला आहे. त्याचे स्वागत केले पाहिजे. हिजाब घालणे हा धर्म स्वातंत्र्याचा भाग नाही हे संवैधानिक सत्य आता आपण सगळ्यांनी स्विकारले पाहिजे. हिजाब धार्मिक स्वातंत्र्याचा भाग नाही या निर्णयाने आपण संवैधानिक होण्याची एक पायरी चढलो आहे. आपला संवैधानिक होण्याचा प्रवास सुरू राहीला तर आपण हे नक्की समजून घेतले पाहिजे की, कोणत्याही देवाच्या मूर्तीपूजा, आरत्या शाळा, कॉलेजमध्ये होणे हा सुद्धा धार्मिक स्वातंत्र्याचा भाग नाही'', असं स्पष्ट मत देखील सरोदे यांनी मांडलं.

''हिजाब हा विषय आता सर्वोच्च न्यायालयात नक्की जाईल. हा विषय सर्वोच्च न्यायालयात जावा अशी कट्टरवादी मुस्लिम राजकारण करणाऱ्यांची इच्छा आहे, तशीच इच्छा कट्टरवादी हिंदूत्व मिरवणाऱ्यांची आहे. सामान्य नागरिकांनी या दोन्ही प्रवृतींपासून दोन हात लांब राहावे'', असा सल्लाही असीम सरोदे यांनी दिला आहे.

नेमकं प्रकरण काय? -

गेल्या काही महिन्यांपासून कर्नाटकमध्ये हिजाबवरून वातावरण तापलं होतं. हिजाब घातलेल्या विद्यार्थिनींना महाविद्यालयानं प्रवेश नाकारला होता. त्यानंतर या विद्यार्थिनींनी शिक्षण विभागाकडे तक्रार केली होती. मात्र, महाविद्यालय किंवा शाळांमध्ये गणवेशातच यावे, असं सरकारनं सांगितलं होतं. त्यानंतर विद्यार्थिनींनी कर्नाटक उच्च न्यायालयात धाव घेतली होती. आज न्यायालयाने निकाल दिला असून हिजाब हा धार्मिक स्वातंत्र्याचा भाग नाही, असं न्यायालयानं म्हटलं आहे.