Assembly Election 2024 : नुकत्याच पार पडलेल्या लोकसभा निवडणुकीत नवनीत राणा यांना भाजपच्या अमरावती येथील स्थानिक पदाधिकाऱ्यांनी विरोध केला होता. याशिवाय बच्चू कडू यांचा विरोध होताच. त्यामुळे नवनीत राणा यांना पराभव पत्करावा लागला. आता रवी राणा यांनादेखील विरोध होत आहे.

अमरावती लोकसभा निवडणुकीत नवनीत राणा यांच्या उमेदवारीला विरोध करणारे स्थानिक भाजपचे पदाधिकारी रवी राणा यांनादेखील विरोध करत आहेत. आगामी विधानसभा निवडणुकीत रवी राणा नको, अशी भूमिका भाजप पदाधिकाऱ्यांनी घेतली आहे. 'साम टीव्ही'ने सूत्रांच्या हवाल्याने हे वृत्त दिले आहे.

अमरावती जिल्हा भाजपच्या बैठकीत यासंदर्भात निर्णय झाल्याची सूत्रांची माहिती आहे. बडनेरा विधानसभा मतदारसंघ महायुतीतून भाजपलाच सोडावा व स्थानिक भाजपला उमेदवारी द्यावी, अशी स्थानिक भाजपची मागणी आहे.

''भाजपच्या वरिष्ठांशी जवळीक आणि खालच्या भाजप कार्यकर्त्यांवर वरवंटा फिरवणारे रवी राणा नकोच.'' असा स्थानिक कार्यकर्त्यांचा विरोधी सूर आहे. विधानसभा निवडणुकीत रवी राणा यांना उमेदवारी देऊ नका, याबाबत भाजपचे पदाधिकारी श्रेष्ठींना बोलणार आहेत.