नांदेड - मागील तीन दिवसांपासून नांदेड येथील शासकीय रुग्णालयात रुग्णांचे मृत्यू होत आहे. मृतांचा आकडा आता ३५ वर पोहोचला आहे. शिवाय रुग्णालयात डॉक्टर-रुग्णांची आणि औषधांची कमतरता असल्याचं समोर आलं आहे. या पार्श्वभूमीवर माजी मुख्यमंत्री अशोक चव्हाण यांनी रुग्णालयात सुविधा पुरवण्यासाठी पुढाकार घेतला आहे. खुद्द अशोक चव्हाण यांनीच याबाबत माहिती दिली आहे.

अशोक चव्हाण म्हणाले की, गेल्या तीन दिवसांपासून शंकरराव चव्हाण वैद्यकीय महाविद्यालयाची परिस्थिती फार चिंताजनक आहे. यात रोजच रूग्णांचा मृत्यू होण्याचा अकडा समोर येत आहे. डॉक्टर, नर्स व औषधांची कमतरता लक्षात आली आहे. वैद्यकीय महाविद्यालयातील परिस्थिती सुधारण्यासाठी काही खाजगी डॉक्टर व नर्स यांच्याशी व्यक्तिगतरीत्या बोलणी सुरू असल्याचं चव्हाण यांनी म्हटलं.

दरम्यान युवक काँग्रेसच्या एक लाख व आज साडेचार लाख रुपये किंमतीची औषधी रुग्णालयाला देण्यात आली आहे. या पुढेही औषधी देण्याचा ओघ सुरूच राहिल असंही चव्हाण यांनी म्हटलं.