विधानसभेचे अपक्ष आमदार बच्चू कडू यांना नाशिक विशेष न्यायालयाने दोन प्रकरणात दोन वर्षांची शिक्षा सुनावली असल्याने त्यांची आमदारकी तातडीने रद्द करावी, अशी मागणी शिवसेना (उद्धव बाळासाहेब ठाकरे) पक्षाचे आमदार अजय चौधरी यांनी विधानसभा अध्यक्ष अॅड. राहुल नार्वेकर यांच्याकडे पत्र लिहून केली आहे. तसेच ८ मार्च रोजी बच्चू कडू यांना शिक्षा सुनावण्यात आल्यानंतरही त्यांनी विधानसभेच्या कामकाजात भाग घेतला यासाठी त्यांच्यावर दंडात्मक कारवाई केली जावी अशी मागणीही अजय चौधरी यांनी केली आहे.

काँग्रेसचे नेते राहुल गांधी यांना मानहानीच्या प्रकरणी दोन वर्षांची शिक्षा सुनावल्यानंतर त्यांची खासदारकी लोकसभा सचिवालयाने तातडीने रद्द केल्यानंतर राज्यातही त्याच न्यायाने शिक्षा सुनावण्यात आलेल्या सदस्यांवर कारवाई केली जावी अशी मागणी जोर धरू लागली आहे. बच्चू कडू यांना ८ मार्च रोजी शिक्षा सुनावण्यात आल्यानंतर १५ मार्चपर्यंत त्यांचे सदस्यत्व रद्द करण्याचे पत्र विधानसभा अध्यक्षांकडून काढणे अपेक्षित असताना २६ एप्रिलपर्यंत कडू यांचे सदस्यत्व रद्द केलेले नसल्याकडे त्यांनी अध्यक्षांचे लक्ष वेधले आहे.

विधानसभेचे सदस्यत्व आपोआप रद्द झालेले माहिती असतानाही बच्चू कडू हे सभागृहाच्या कामकाजात सहभागी झाले म्हणून त्यांच्यावर प्रती दिन ५०० रुपयांची दंडात्मक कारवाई केली जावी अशी मागणीही चौधरी यांनी केली आहे.

उच्च न्यायालयाने शिक्षेच्या अंमलबजावणीला स्थगिती दिलेली आहे, शिक्षेला नाही असेही चौधरी यांनी नमूद केले.

माझ्या विरोधात विधानसभा अध्यक्षांकडे तक्रार केली असल्याचे मला माध्यमांकडून कळले. मला एक वर्षाची शिक्षा सुनावण्यात आलेली आहे आणि शिक्षेला स्थगितीही मिळालेली आहे. त्यामुळे माझ्या विधानसभा सदसत्वावर काहीही परिणाम होणार नाही aसही प्रतिक्रिया बच्चू कडू यांनी दिली आहे.