ठाकरे गटाचे नेते आणि खासदार संजय राऊत यांनी माजी मुख्यमंत्री उद्धव ठाकरे यांची दैनिक ‘सामना’साठी मुलाखत घेतली आहे. त्यांच्या मुलाखतीचा आज दुसरा भाग आहे. या मुलाखतीवेळी उद्धव ठाकरेंनी आपली रोखठोक मतं मांडताना दिसून आले. या मुलाखतीत त्यांनी हिंदुत्वापासून विविध मुद्द्यावर भाष्य केलं. यावेळी त्यांनी विरोधकांच्या बैठकीवर, महाविकास आघाडी, शिवसेना, राष्ट्रवादी आणि सद्याची राजकीय परिस्थीती या संपुर्ण परिस्थितीवरही परखड भाष्य केलं आहे. यावेळी त्यांनी भाजपला लक्ष केलं आहे.

मुलाखतीवेळी संजय राऊत यांनी ठाकरेंना प्रश्न केला की, देशात भल्याभल्यांनी ईडी, सीबीआय यांच्यासमोर शरणागती पत्करली तुम्ही का नाही पत्करली, यावर उध्दव ठाकरेंनी उत्तर देताना राऊत यांना प्रतिप्रश्न केला की, तुम्ही का नाही पत्करली शरणागती, त्यावर पुन्हा राऊत म्हणाले, तुम्ही शरणागती पत्करावी म्हणून त्यांनी अनेक प्रयोग केले तुमची काय भूमिका आहे.

यावर उत्तर देताना उध्दव ठाकरे म्हणाले की, कोणी एकेकाळी शिवसेनाप्रमुखांनी तुम्हाला दोघांना वाचवलं होतं. माननीय पंतप्रधान मोदी आणि अमित शहांना. त्याचे पांग तुम्ही असे फेडताय का? आणि मला संपवण्यात तुम्हाला आनंद मिळत असेल तर तुम्ही संपवा. बघू या माझ्या वडिलांचे आशीर्वाद, माझ्या जनतेची सगळी साथसोबत आणि तुमची ताकद माझ्या पाठीशी आहे, परंतु ही लढाई कशासाठी करायची आम्ही तुमच्या सोबत होतो, खरं म्हणजे तुम्ही देशाच्या शत्रुशी लढायला पाहिजे, पक्षाच्या शत्रुशी नाही, असंही ठाकरे पुढे म्हणाले आहे.

उद्धव ठाकरे म्हणजे बाळासाहेबांचे विचार आहेत

'आज माझ्याविरुद्ध अख्खा भाजप आहे. त्यांचा कोणताही नेता आला तर त्यांना उद्धव ठाकरेंशिवाय दुसरे काही बोलता येत नाही. आता खरं तर उद्धव ठाकरेंकडे आहेच काय? पक्ष नाही, शिवसेना तुम्ही चोरली आहे, चिन्ह चोरलं आहे, माझे वडील चोरण्याचा प्रयत्न करत आहात. तरीदेखील तुम्हाला उद्धव ठाकरेंची भीती का वाटते? म्हणूनच मला असं वाटतं की, उद्धव ठाकरे ही एकटी व्यक्ती नाही तर उद्धव ठाकरे म्हणजे बाळासाहेबांचे विचार आहेत', असंही उध्दव ठाकरे म्हणाले आहेत.