Barsu Refinery Protest : राज्यात सध्या बारसू इथं होणाऱ्या रिफायनरीवरुन वादंग सुरू आहे. अशातच भूमिपूत्र आणि स्थानिकांवर कोणताही प्रकल्प लादणार नाही, अशी भूमिका मुख्यमंत्री एकनाथ शिंदे यांनी स्पष्ट केली आहे. या प्रकल्पावरुन बारसू ग्रामस्थांकडून आंदोलन सुरू आहे.

मुख्यमंत्री एकनाथ शिंदे यांनी माध्यमांशी बोलताना आपली भूमिका स्पष्ट केली आहे. "कोणताही प्रकल्प लोकांवर अन्याय करून लादणार नाही. समृद्धी महामार्ग जो आपल्या सरकारने केला, त्यालाही पूर्वी विरोध झाला होता, पण नंतर लोकांनी परवानगी दिली आणि हा महामार्ग झाला. तसंच बारसूतले शेतकरी, भूमिपुत्र यांना विचारात घेऊनच हा प्रकल्प पुढे नेला जाईल", असं मुख्यमंत्री एकनाथ शिंदे यांनी स्पष्ट केलं आहे.

शिंदे पुढे म्हणाले, " प्रकल्प लगेचच उभारला जाणार नाही. तिथे आधी बोअर करण्याचं काम सुरू आहे. मातीची चाचणी होईल, इतर तपासण्या होतील. लगेच प्रकल्प उभा राहणार आहे का तर नाही. पुढच्या अनेक प्रक्रिया आहे. पण कोणत्याही परिस्थिती आपलं सरकार भूमिपुत्रांना विश्वासात घेऊनच पुढे जाणार. "