महाराष्ट्र तेलंगाना सिमेवर माणुसकीला काळीमा फासणारी घटना घडली आहे. भानामती केल्याच्या संशयातून सात जणांना संपूर्ण गावकऱ्यांनी भरचौकात बेदम मारहाण केल्याचा प्रकार समोर आला आहे. चंद्रपूर जिल्ह्यातील जिवती तालुक्यातील वणी या गावात ही धक्कादायक घटना घडली आहे. जादूटोणा केल्याच्या संशयावरुन खांबाला बांधून अमानुष मारहाण करण्यात आली. ही घटना शनिवारी घडली. वृद्ध, महिला, लहान बाळ कोणाचाही विचार न करता बेदम मारहाण करण्यात आली आहे. यात पाच जण गंभीर जखमी झाले असून त्यांना जिवती ग्रामीण रुग्णालयातून चंद्रपूरला हलवण्यात आलेले आहे. याबाबत स्थानिक पोलिसांनी 12 जणांवर गुन्हा दाखल केल्याची माहिती समोर आली आहे. मात्र कुणावर केला, हे सांगण्यास नकार दिला.

वणी या गावात सध्या तणावाचे वातावरण असून पोलिसांचा चोख बंदोबस्तही आहे. बाहेरील कुणालाही गावात येऊ दिले जात नाही. दरम्यान या घटनेला अनेक पदर असल्याचं सागंण्यात येत आहे. संपूर्ण राज्यात खळबळ उडवून देणारी ही घटना असतानाही या प्रकरणाबाबत पोलीस मात्र अतिशय गोपनीयता बाळगत असल्याचे दिसून येते.

मारहाण झालेले कुटुंब मागील काही वर्षांपासून जादूटोणा करत असल्याचा संशय गावातील लोकांना होता. त्यामुळे कुटुंबाला तेलंगणा येथे पाठवण्यात आलं होतं. पण मेहरमच्या आसपास हे कुटुंब पुन्हा गावात परतले. या कुटुंबाने पुन्हा जादूटोणा करण्यास सुरूवात केल्याचा संशय आला. त्यानंतर काही ग्रामस्थांनी कुटुंबाला मारहाण केल्याचा प्रकार समोर आला. या कुटुंबाला होणाऱ्या अमानुष मारहाणीच्या घटनेची माहिती एका अज्ञाताने पोलिसांना दिली. घटनेची माहिती मिळताचं पोलीस घटनास्थळी दाखल झाले.