भीमा कोरेगाव एल्गार परिषद प्रकरणाची मुंबई उच्च न्यायालयातील न्यायमूर्ती अजय गडकरी, न्यायमूर्ती शर्मिला देशमुख यांच्या खंडपीठासमोर सुनावणी पार पडली. मुंबई उच्च न्यायालयाने महेश राऊतला जामीन मंजूर केला आहे. महेश राऊतवर माओवाद्यांशी संबंध असल्याचा आरोप आहे.

दरम्यान 12 सप्टेंबर 2023 रोजी सुनावणी झाली होती. या सुनावणीवेळी आरोपी महेश राऊतच्या जामीन अर्जावर त्याच्या वकिलांकडून जोरदार युक्तिवाद करण्यात आलेला होता. राष्ट्रीय तपास संस्थेने म्हटलं होतं की, महेश राऊत प्रतिबंधित माओवादी पक्षाशी संबंध आहे. तर आरोपीचे वकीलांनी त्याच्या सहभागाबद्दलचा पुरावा नसल्याचा, युक्तिवाद केला आहे.

त्या जोरदार युक्तिवादानंतर मुंबई उच्च न्यायालयाने आज महेश राऊतला जामीन मंजूर केला आहे. त्याचबरोबर या निर्णयाला आव्हान देण्यासाठी एनआयएला एका आठवड्याची मुदत देण्यात आली आहे. महेश राऊतच्या जामीन अर्जाला एनआयएने विरोध केला होता.

एल्गार परिषदेशी कथित माओवाद्यांशी संबंध असल्याच्या आरोपावरून महेश राऊतला 31 डिसेंबर 2017 रोजी पुण्यात अटक करण्यात आली होती. आज त्याला मुंबई उच्च न्यायालयाचे न्यायमूर्ती अजय गडकरी, न्यायमूर्ती शर्मिला देशमुख गडकरी यांच्या खंडपीठाने राऊतचा जामीन मंजूर केला आहे.