तात्या लांडगे

सोलापूर : सामाजिक न्याय व विशेष साहाय्य विभागाकडून राज्य व केंद्र पुरस्कृत योजनांचे अनुदान यापूर्वी बीम्स प्रणालीतून तहसील स्तरावरून बँकेत पाठवून लाभार्थींच्या खात्यावर वर्ग केले जात होते. आता महाराष्ट्र शासनाच्या नवीन धोरणानुसार डिसेंबर २०२४ पासून संजय गांधी निराधार अनुदान योजना व श्रावणबाळ राज्यनिवृत्ती वेतन या योजनांमधील लाभार्थींचे अनुदान ‘डीबीटी’ प्रणालीद्वारे थेट लाभार्थ्यांच्या खात्यावर जमा केले जात आहे.

वैयक्तिक लाभाच्या योजनांमधील लाभार्थींची माहिती ३१ जुलैपूर्वी ‘डीबीटी’ प्रणालीवर भरण्याची कार्यवाही करावयाची आहे. या योजनांच्या लाभार्थींची माहिती ‘डीबीटी’ पोर्टलवर भरणे व त्यांचे आधार पडताळणी करण्याचे कामकाज सुरू आहे. बऱ्याच लाभार्थींनी हयात प्रमाणपत्र किंवा वैयक्तिक माहिती तहसील कार्यालयास सादर केलेली नाही, त्यामुळे त्यांना अनुदानाचा लाभ घेता आलेला नाही.

संजय गांधी निराधार अनुदान योजना व श्रावणबाळ राज्य निवृत्ती वेतन योजनेतील ज्या लाभार्थींनी अद्यापही पोर्टलवर माहिती अपलोड केलेली नाही, त्यांची यादी सर्व तहसील कार्यालयांमध्ये प्रसिद्ध करण्यात आली आहे. त्या सर्व लाभार्थींनी मुदतीत सर्व माहिती पोर्टलवर अपलोड करायची आहे. जिल्ह्यातील सुमारे १० हजारांहून अधिक लाभार्थींनी डीबीटी पोर्टलवर माहिती भरलेली नाही. त्यांचा लाभ पुढे कायम सुरू ठेवण्यासाठी ही मुदत देण्यात आली आहे.

...तर अनुदान मिळणार नाही

लाभार्थींनी तत्काळ बँक पासबुक, आधार कार्ड, (आधार कार्ड व मोबाईल नंबर बँकेच्या खात्याला लिंक व अपलोड) मोबाईल नंबर (आधार कार्ड लिंक असलेले), शिधापत्रिका, अपंग प्रमाणपत्र, विधवा महिलेच्या बाबतीत पतीचा मृत्यू दाखला व इतर आवश्यक कागदपत्रे घेऊन ३१ जुलैपूर्वी तहसील कार्यालयांमधील संजय गांधी शाखांमध्ये जमा करायचे आहेत. मुदतीत कागदपत्रे सादर न करणाऱ्यांना अनुदानापासून वंचित राहावे लागणार आहे.