सोलापूर : सोलापूर जिल्ह्यात पावणेदोन लाख महिला संजय गांधी निराधार योजनेच्या लाभार्थी आहेत. पण, १२ महिन्यांपूर्वी प्रशासनाने आवाहन करूनही सोलापूर जिल्ह्यातील ८० हजार महिलांनी हयातीचे दाखलेच दिलेले नाहीत. लाडकी बहीण योजनेपूर्वी निराधार योजनेतील काही महिला एजंटांच्या माध्यमातून लाभार्थी झाल्याचा संशय प्रशासनाला आहे. त्यामुळे आता त्या लाभार्थींची घरोघरी जाऊन पडताळणी (जिवंत-मृत आहेत की स्थलांतरित आहेत) केली जाणार आहे.
संजय गांधी निराधार योजनेचा लाभ घेण्यासाठी दरवर्षी लाभार्थींना हयातीचा दाखला द्यावा लागतो. जेणेकरून मयत, स्थलांतरित लाभार्थींचा लाभ बंद करणे प्रशासनाला सोयीचे होते. एजंटांनी शेकडो महिलांकडून पैसे घेऊन आणि दरमहा काही ठरावीक रक्कम देण्याच्या अटीवर त्यांना निराधार योजनेचे अनुदान सुरू केले. सुरवातीला अर्जदार महिलांना अधिकाऱ्यांसमोर यावे लागत नाही, मात्र हयातीचा दाखला द्यायला दरवर्षी यावे लागते.
त्यामुळे मुख्यमंत्री लाडकी बहीण योजना सुरू झाल्याने हयातीचे दाखल द्यायची पंचाईत झालेल्या एजंटांनी त्या निराधार महिलांचे अर्ज लाडकी बहीण योजनेत भरून तेथे लाभ सुरू केला. त्यामुळेच प्रशासनाच्या आवाहनानंतरही निराधार योजनेतील सर्व महिलांनी हयातीचे दाखलेच दिले नाहीत, असा संशय आहे. त्यामुळे हयातीचे दाखले न दिलेल्यांची पडताळणी करून त्यांचा लाभ यापुढे बंद होऊ शकतो, असे वरिष्ठ अधिकाऱ्यांनी सांगितले.
हयातीचे दाखले दिल्याशिवाय लाभ नाही
सोलापूर जिल्ह्यात संजय गांधी निराधार योजना व श्रावण बाळ योजनेचे एक लाख ७३ हजार लाभार्थी आहेत. त्यांना फेब्रुवारी २०२४ मध्ये हयातीचे दाखले द्यायला सांगितले, तरीपण अजून ८० हजार लाभार्थींनी हयातीचे दाखले दिलेले नाहीत. त्यात सोलापूर शहरातील सर्वाधिक लाभार्थी असून अनेक महिला लाडकी बहीण योजनेचा लाभ घेत आहेत. हयातीचे दाखले न दिल्यास लाभार्थींची यादी प्रसिद्ध करुन त्यांच्या लाभासंदर्भात निर्णय घेतला जाईल.
- शिल्पा पाटील, तहसीलदार, संजय गांधी निराधार योजना, सोलापूर
जिल्ह्यात महिला १८.७६ लाख अन्‌ योजनांच्या लाभार्थी १२.५० लाखांवर
सोलापूर जिल्ह्यात १८ वर्षांवरील महिला मतदारांची संख्या १८ लाख ७६ हजारापर्यंत आहे. त्यापैकी जवळपास दीड लाख महिला (६५ वर्षांखालील) संजय गांधी निराधार योजनेचा लाभ घेतात. दुसरीकडे मुख्यमंत्री लाडकी बहीण योजनेचा लाभ घेणाऱ्या महिला ११ लाख नऊ हजारांवर आहेत. अशीच स्थिती बऱ्याच जिल्ह्यांमध्ये आहे. पुणे, कोल्हापूर, सांगली, अहिल्यानगर, सातारा यासह अन्य जिल्ह्यांच्या तुलनेत सर्वाधिक निराधार महिला सोलापूर जिल्ह्यात असून लाडक्या बहिणीच्या लाभार्थींमध्येही सोलापूर पहिल्या १० जिल्ह्यांमध्ये आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.