कोल्हापूर : एकाही सरकारला ‘कॅबिनेट’ची बैठक रायगडावर (Raigad) घ्यावी, असे का वाटत नाही? असा प्रश्‍न संभाजीराजे छत्रपती (Sambhajiraje Chhatrapati) यांनी आज उपस्थित केला. मराठा समाजाचे सामाजिक मागासलेपण सिद्ध झाल्याखेरीज पुढे जाता येणार नाही, असेही ते म्हणाले.

(लोकल ते ग्लोबल लेटेस्ट अपडेट मिळवा सकाळच्या व्हॉट्सअप चॅनेलवर फक्त एका क्लिकमध्ये)

नवीन राजवाडाच्या (न्यू पॅलेस) परिसरात त्यांनी पत्रकारांशी संवाद साधला. संभाजीराजे म्हणाले, ‘रायगड ही छत्रपती शिवरायांची राजधानी आहे. सुराज्य म्हणजे काय, हे रायगडावर गेल्याखेरीज कळणे अशक्य आहे. त्यासाठी सरकारने तेथे कॅबिनेट बैठक घेणे आवश्‍यक आहे. दुर्दैवाने सरकारला तशी इच्छा वाटत नाही.'

ते पुढे म्हणाले, राज्य शासनाने मराठा समाजाचे (Maratha Reservation) मागासलेपण सिद्ध करणे जरुरीचे आहे. मागासवर्गीय आयोगासमोर ते सिद्ध झाल्यानंतर त्याबाबतचा अहवाल केंद्रीय मागासवर्गीय आयोगाकडे पाठवला जाईल. मराठा समाजाचा कसा सर्व्हे करणार, समाजाला आरक्षण कसे देऊ शकतो, याची स्पष्टोक्ती महत्त्वाची आहे. जाती-पातीच्या पुढे जाऊन विचार केला पाहिजे.

अठरापगड जाती-धर्मांचा महाराष्ट्र आहे. येथे मराठा व ओबीसी यांना एका छताखाली कसे आणता येईल, यासाठी सर्वांनी प्रयत्न करणे गरजेचे आहे. त्यांच्यासमोर शिव-शाहूंची भूमिका मांडायला हवी. नव्या संसदेत खासदारांना प्रश्‍न मांडण्याची संधी आहे. दुर्दैवाने पंधरा-वीस वर्षांत संसदेचे कामकाज जसे चालायला हवे तसे चाललेले नाही. नव्या सभागृहात लोकांचे अधिकाधिक प्रश्‍न सुटावेत, इतकीच अपेक्षा आहे, असेही संभाजीराजेंनी स्पष्ट केले.