मुंबई : दादरा नगर हवेलीच्या पोटनिवडणुकीमध्ये शिवसेनेचा एक खासदार निवडून आला. त्यानंतर आम्ही दिल्लीच्या राजकारणात जाणार असं संजय राऊतांनी (Sanjay Raut) सांगितलं होतं. तसेच आता ममता बॅनर्जीसोबत (Mamata Banerjee) देखील संजय राऊतांची बैठक झाली. त्यावरूनही भाजपचे प्रदेशाध्यक्ष चंद्रकांत पाटलांनी (Chandrakant Patil) शिवसेना आणि मुख्यमंत्री उद्धव ठाकरेंवर हल्लाबोल केला आहे.

''भाजपच्या जीवावर १८ खासदार निवडून आणणाऱ्यांनी, भाजपच्या जीवावर निवडणूक जिंकणाऱ्यांनी देशाच्या राजकारणात जाण्याची स्वप्न पाहू नये. पळवून आणलेल्या खासदार तुमच्या चिन्हावर निवडून आले का? एका खासदाराच्या जोरावर म्हणतात आम्ही देशाच्या राजकारणात जाणार. त्यासाठी देशभर फिरावं लागतं. ते करण्याची यांची तयारी नाही. उद्धव ठाकरे मातोश्रीमधून कधी बाहेर पडत नाहीत. गेल्या दोन वर्षात एकदाही उद्धवजी मंत्रालयात गेले नाहीत'', असं चंद्रकांत पाटील म्हणाले.

पश्चिम बंगालच्या मुख्यमंत्री ममता बॅनर्जी काही दिवसांपूर्वी मुंबई दौऱ्यावर आल्या होत्या. यावेळी त्यांनी शिवसेनेचे खासदार संजय राऊतांची भेट घेतली. त्यानंतर संजय राऊतांनी ममता या बंगालच्या वाघिण आहेत, असं म्हटलं होतं. त्यावरूनही चंद्रकांत पाटलांनी संजय राऊतांवर हल्लाबोल केला आहे. ''संजय राऊत एक नंबरचे डबलढोलकी आहेत. मुंबईमध्ये ममता बॅनर्जींच्या सुरात सुर मिसळतात. दिल्लीत गेले की राहुल गांधींच्या सुरात सुर मिसळतात. ते खुर्ची टिकविण्यासाठी काहीही करायला तयार आहेत. आता ममतांच्या युपीएबद्दलच्या वक्तव्यामुळे राहुल गांधी आणि सोनिया गांधींनी डोळे वटारले असतील'', असे चंद्रकांत पाटील म्हणाले.