बिहारची राजधानी पाटणा येथे देशातील विरोधकांची बैठक होत आहे. या बैठकीत आगामी लोकसभा निवडणूकीत भाजपला रोखण्यासाठी चर्चा केली जाणार आहे. या बैठकीला महाराष्ट्रातून ठाकरे गटाचे नेते उद्धव ठाकरे देखील पोहचले आहेत. दरम्यान या बैठकीवरून भाजपचे राष्ट्रीय अध्यक्ष जेपी नड्डा यांनी उद्धव ठाकरेंवर बाळासाहेब ठाकरे यांची आठवण सांगत हल्लाबोल केला आहे.

उद्धव ठाकरे आज पाटण्याला पोहोचले आहेत. हिंदु शिवसेना हे हिंदुविषयी बोलणारे उद्धव ठाकरे यांचे वडील 'हिंदुसम्राट' बाळासाहेब ठाकरे म्हणायचे की ते शिवसेनेला काँग्रेस होऊ देणार नाही. जर काँग्रेसशी हातमिळवणी करावी लागली तर मी माझं दुकान बंद करेन. आज बाळासाहेब ठाकरे विचार करत असतील की दुसरं कोणी नाही तर माझ्याचं मुलाने शिवसेनेचे दुकान बंद केलं, अशी टीका भाजपचे राष्ट्रीय अध्यक्ष जेपी नड्डा, ओडिशातील कालाहांडी येथे

विरोधकांच्या या बैठकीवर भाजप नेते देवेंद्र फडणवीस यांनी देखील टीका केली आहे. ते म्हणाले की, पाटण्याला होत असलेली बैठक मोदी हटाव नाहीये तर परिवार बचाओ बैठक आहे. सर्व परिवारवादी पक्ष एकत्र आले आहेत. आपला परिवार कसा वाचू शकेल आणि आपल्याच कुटुंबाकडे कशी सत्ता राहील याकरिता सगळे एकत्र आले आहेत. कारण यांच्यासाठी राज्य चालवणं हा धंदा आहे.

तर भाजप आणि मोदी यांच्यासाठी ती सेवा आहे. म्हणून येणाऱ्या काळात २०१९ ला यांनी एकत्र येवून पाहिलं, पण जनता मोदींच्या पाठिशी आहे. असे कितीही मेळावे केले तरी त्याचा काहीही परिणाम होणार नाही. असेही फडणवीस यावेळी म्हणाले.

उद्धव ठाकरेंना फडणवीसांचा टोला..

सातत्याने मेहबुबा मुफ्तींच्या नावावर भाजपला टोमणे मारणारे उद्धव ठाकरे आता मेहबुबा मुफ्तींसोबत चाललेच नाहीत तर त्यांच्या बाजूला बसलेत. सत्तेकरिता आणि परिवार वाचवण्यासाठी सर्व तडजोडी करायला तयार आहेत पण याचा कुठलाही परिणाम होईल असं वाटत नाही असेही देवेंद्र फडणवीस म्हणाले.