गेल्या काही दिवसांपासून राज्यात अनेक चर्चा रंगल्या आहेत. अशातच महाराष्ट्रात सत्ताबदल होणार असून राजकीय भूकंपांची चर्चा राजकीय वर्तुळात जोर धरू लागल्या आहेत. काही दिवसांपूर्वीच राष्ट्रवादी फुटणार आणि अजित पवार ४० आमदारांसह भाजपामध्ये प्रवेश करणार अशा चर्चा रंगल्या होत्या. मात्र अजित पवारांनी पत्रकार परिषद घेत स्पष्टीकरण दिलं आणि शेवटच्या श्वासापर्यंत आपण राष्ट्रवादी काँग्रेसमध्ये राहणार असल्याचं म्हटलं आहे.

दरम्यान या संपूर्ण राजकीय पार्श्वभूमीवर भाजप नेत्या पंकजा मुंडे यांनी चिंता व्यक्त केली आहे. इतके राजकीय भूकंप झाले तर मला महाराष्ट्राची काळजी वाटते आहे असं वक्तव्य पंकजा मुंडे यांनी केलं आहे.

पंकजा मुंडे बोलताना म्हणाल्या की, “मला इतके राजकीय भूकंप झाले तर मला टेन्शन येतं. माझा महाराष्ट्र कसा राहिल? याचं मला टेन्शन येतं. महाराष्ट्राचं राजकारण कसं असेल याचंही टेन्शन येतं. मला या सगळ्याचे काही संकेत असण्याचा काही भाग नाही. कारण राज्यातले नेते याबाबत निर्णय घेतील. भाजपाला अतिरिक्त नेत्यांची गरज आहे का? लोकांची गरज आहे का? या निर्णय घेण्याच्या प्रक्रियेत मी नाही” असंही पुढे पंकजा मुंडे यांनी म्हटलं आहे.

तर “माझ्या पंधरा वर्षांच्या राजकारणात मी कधीही कुणावर व्यक्तिगत पातळीवर टीका केली नाही. भूकंप विरहित पक्ष बांधणीची गरज आहे. मुख्यमंत्री कोण झालं पाहिजे हे आमच्या हातात नाही. २०२४ च्या निवडणुकीत ते जनता ठरवणार असल्याचंही त्या म्हणाल्या आहेत. तर लोकांचा विश्वास जिंकून भाजपाने निवडणुका जिंकल्या आहेत. यापुढेही तसंच होईल” असा विश्वास पंकजा मुंडे यांनी यावेळी व्यक्त केला आहे.

'परळी कृषी उत्पन्न बाजार समितीत माझी लढाई आहे. दोघेही मल्ल मोठ्या शक्तीचे आहेत. मात्र प्रवृत्ती वेगळी आहे', असं म्हणत पंकजा मुंडे यांनी आपले भाऊ आणि राष्ट्रवादी काँग्रेसचे आमदार धनंजय मुंडे यांच्यावर टीका केली. काही दिवसांपूर्वी मात्र या दोघांनी एकमेकांचं कौतुक केलं होतं. एका कार्यक्रमादरम्यान ते एकाच मंचावर आले होते.