मुख्यमंत्री एकनाथ शिंदे यांनी केलेल्या बंडामुळे शिवसेनेत फूट पडली. यानंतर शिवसेनेचे दोन गट निर्माण झाले. यानंतर शिवसेना प्रमुख बाळासाहेब ठाकरे यांनी सुरु केलेला दसरा मेळावा कोण, घेणार यावरून चांगलाच वाद रंगला. शिवसेना आणि शिंदे गटाने मुंबई महानगरपालिकेत शिवाजी पार्कसाठी अर्ज दाखल केले होते. मात्र, सुरक्षेच्या कारणास्तव दोन्ही गटांचे अर्ज फेटाळण्यात आले होते. त्यानंतर शिवसेनेने उच्च न्यायालयात धाव घेतली. उच्च न्यायालयाने यावर दसरा मेळाव्यावर सुनावणी करत शिवसेनेला दसरा मेळावा घेण्यासाठी परवानगी दिली आहे. यावरून भाजप नेते सुधीर मुनगंटीवार यांनी शिवसेनेला जोरदार टोला लगावला आहे. दसरा मेळाव्याचा निकाल शिवसेनेच्या बाजुने लागला, यावरून मुनगंटीवार यांनी शिवसेनेवर निशाणा साधाला आहे.

भाजप नेते सुधीर मुनगंटीवार यांनी शिवसेनेला दसरा मेळाव्याच्या निकालावरून शिवसेनेवर निशाणा साधला आहे. दसरा मेळाव्याचा निकाल शिवसेनेच्या बाजुने लागला. उच्च न्यायालयाने शिवसेनेचा युक्तिवाद ऐकल्यानंतर शिवसेनेला शिवाजी पार्कवर दसरा मेळावा घेण्याची परवानगी दिली आहे. काही नेत्यांकडून कायमच न्यायालयाच्या भूमिकेवर संशय घेतला जातो. मात्र यावेळी निकाल त्यांच्या बाजुने लागला आहे. यामुळे आता तरी त्यांचा न्यायालयावरील विश्वास वाढेल असं सुधीर मुनगंटीवार म्हणाले आहेत.

गेल्या काही दिवसांपासून शिवाजी पार्कवर दसरा मेळावा कोणाचा होणार यावरून राज्यातलं राजकारण चांगलचं तापलं होतं. मात्र उच्च न्यायालयाच्या निकालानंतर आता शिवाजी पार्कवर शिवसेनेचाच दसरा मेळावा होणार हे स्पष्ट झालं आहे. यामुळे शिवसैनिकांमद्धे जल्लोष पाहायला मिळत आहे.