Maharashtra Politics : एकनाथ शिंदेंसह (Eknath Shinde) शिवसेनेतील जवळपास 40 आमदार आणि 10 अपक्ष आमदारांनी बंडखोरी केल्यानंतर राज्यातील महाविकास आघाडी सरकार कोसळलं. यानंतर राज्यात शिंदे-फडणवीस सरकार स्थापन झालं. आता शिंदे गट विरुध्द ठाकरे गट असा सामना पहायला मिळत आहे.

त्यातच आता भाजपा आध्यात्मिक आघाडीचे प्रदेशाध्यक्ष तुषार भोसले (Tushar Bhosale) यांनी खरी शिवसेना मुख्यमंत्री एकनाथ शिंदे यांच्याकडंच आहे, असं म्हटलंय. शिवाय, त्यांनी उद्धव ठाकरेंचा (Uddhav Thackeray) देखील चांगलाच समाचार घेतला. उद्धव ठाकरे शिल्लक शिवसेना‌( Shiv Sena) वाचवण्यासाठी पंढरीची वारी‌ऐवजी ओवैसींची गळाभेट घेण्यासाठी हैद्राबादची वारी करतील, असा टोला तुषार भोसलेंनी आज (गुरुवार) पंढरपुरात (Pandharpur) बोलताना लगावला. भोसले पंढरपुरात आले होते. त्यावेळी त्यांनी माध्यमांशी संवाद साधला.

उद्धव ठाकरे आणि बाळासाहेब आंबेडकर एकत्र येणार आहेत अशी‌ चर्चा सुरू झालीय. यावर आपलं मत काय असं तुषार भोसलेंना विचारलं असता, त्यांनी खरी शिवसेना मुख्यमंत्री एकनाथ शिंदे यांच्याकडंच आहे. उद्धव ठाकरेंच्या नेतृत्वात एक शिल्लक गट आहे. तो गट अनेक विषारी लोकांबरोबर युती करण्याचा प्रयत्न करत आहे. त्यांची बाळासाहेब आंबेडकर (Balasaheb Ambedkar) यांच्याशी काय चर्चा झाली याची माहिती नाही, पण उद्धव ठाकरे हे आता पंढरीऐवजी ओवैसींची गळाभेट घेण्यासाठी हैद्राबादची वारी करतील, हे मात्र निश्चित आहे, असा टोला त्यांनी ठाकरेंना लगावला. दरम्यान, संभाजी भिडेंनी महिला पत्रकारास टिकली लाव असं म्हटलं, त्यावर भिडे गुरुजी यांच्या वक्तव्याशी मी सहमत नसल्याचं त्यांनी स्पष्ट केलं.