नागपूर : नथुराम गोडसेची भूमिका केल्याने खासदार अमोल कोल्हे (Amol Kolhe) वादात सापडले आहेत. त्यांच्यावर अनेकांनी टीका केली. पण, भूमिका केली त्यावेळी मी राजकीय पक्षाशी संबंधित नव्हतो, असं त्यांनी सांगितलं. तसेच त्यांनी आळंदी येथे महात्मा गांधी (Mahatma Gandhi) यांच्या रक्षा विसर्जन स्तंभ परिसरात आत्मक्लेश केला. त्यावरूनच आता भाजप आमदारांनी (BJP MLA) टीका केली आहे.

नथुरामची भूमिका केली म्हणून आत्मक्लेश करणारे अमोल कोल्हे या भूमिकेसाठी मिळालेले मानधान परत करणार का? असा प्रश्न नागपुरातील भाजपचे आमदार कृष्णा खोपडे यांनी केला आहे. तसेच पुछता है भारत, असंही त्यांनी म्हटलं आहे.

नेमका काय आहे वाद? -

''Why I Killed Gandhi'' हा चित्रपट आज रिलीज होत आहे. यामध्ये राष्ट्रवादीचे खासदार अमोल कोल्हे यांनी नथुराम गोडसेची भूमिका साकारली आहे. त्यावरून त्यांच्यावर टीका करण्यात आली. काँग्रेसने देखील विरोध केला. पण, राष्ट्रवादीचे अध्यक्ष शरद पवार यांनी स्वतः अमोल कोल्हेंना पाठिंबा दिला. कलाकार म्हणून ते भूमिका करू शकतात. याचा अर्थ त्यांची विचारसरणी तशी आहे असं नाही, असे शरद पवार म्हणाले होते. तसेच माझ्या भूमिकेकडे फक्त कलाकार म्हणून बघावं, असं अमोल कोल्हे म्हणाले होते.

अमोल कोल्हेंचा आत्मक्लेश -

व्हाय आय किल्ड गांधी’ या चित्रपटात मी केलेल्या भूमिकेच्या संदर्भात अनेकांनी नाराजी व्यक्त केली आहे. अनेकांनी मला व्यक्तिशा ही गोष्ट सांगितली की आम्ही तुम्हाला छत्रपती शिवाजी महाराजांच्या रूपातही स्वीकारलं आणि छत्रपती संभाजी महाराजांच्या रूपात स्वीकारलं आणि त्यानंतर आम्हाला तुम्हाला या अशा भूमिकेत बघणं खरंतर आम्हाला पसंत पडलेलं नाही. ज्यांच्या भावना दुखावल्या गेल्या त्यांच्याबद्दल मी नक्कीच दिलगिरी व्यक्त करतो, असे अमोल कोल्हे म्हणाले. त्यांनी आळंदी येथे महात्मा गांधी यांच्या रक्षा विसर्जन स्तंभ परिसरात आत्मक्लेश केला.