भाजप आमदार गोपीचंद पडळकर यांनी पुन्हा एकदा ठाकरे सरकारवर टीका केली आहे. ठाकरे सरकारच्या निष्क्रीयतेमुळे स्वप्नील लोणकरचा जीव गमवावा लागला होता. त्यांनतरही या प्रस्थापितांच्या सरकारनं ना नियुक्त्या दिल्या ना पदभरत्या केल्या असं त्यांनी म्हटलं आहे. तसंच रिक्त पदे जास्त असूनही ठाकरे सरकारने लोकसेवा आयोगाकडे पदभरतीसाठी कमी जागांची मागणी केली असल्याचं पडळकर यांनी म्हटलं.

गोपीचंद पडळकर म्हणाले की, वेगवेगळ्या वीस विभागातील ११ हजार ३५१ पद रिक्त आहे. मात्र लोकसेवा आयोगाकडं फक्त आणि फक्त ४ हजार २६४ रिक्त पदांच्या पदभरतीची मागणी केली. यातली धक्कादायक गोष्ट म्हणजे कोविडच्या काळात वैद्यकीय शिक्षण विभागात सर्वच श्रेणीतील पद २५०० च्या आसपास पद रिक्त आहेत. तरीही अमित देशमुख यांच्या खात्याने लोकसेवा आयोगाला काहीच मागणी केली नाही. हीच बोंब अनके खात्यांची आहे.

ठाकरे सरकार आणि प्रशासनात सावळा गोंधळ असल्याचा आरोपही गोपीचंद पडळकरांनी केला. प्रशासन व सरकार यांच्यात कसलाही ताळमेळ नाही. हे काय फक्त एकमेकांसोबत टक्केवारीच्या फुगड्या खेळतायेता का? असा सवाल पडळकरांनी विचारला आहे.

सरकारवर टीका करताना पडळकर म्हणाले की, स्वताची मुलं, नातू, आमदार खासदार होण्यापुरतं फक्त प्रस्थापितांकडं रिक्तपदे असतात. मात्र बहुजन समाजातील मुलांनी यांच्या सतरंज्याच उचल्याव्यात ही मानसिकता या सरकारची आहे.