सातारा : जास्त दिवस घोंगडे भिजत ठेवले तर ते वास मारते. जास्त दिवस एखाद्याकडे दुर्लक्ष केले, तर चीड येणारच. इतर राज्यांनी आरक्षणाची मर्यादा वाढवली आहे. त्याप्रमाणे मराठा समाजाला आरक्षण (Maratha Reservation) देण्यासाठी महाराष्ट्रात देखील आरक्षणाची मर्यादा वाढवली, तर सहज प्रश्न सुटतील, असे मत खासदार उदयनराजे भोसले (Udayanraje Bhosale) यांनी व्यक्त केले.

राज्यस्तरीय नियोजन समितीच्या बैठकीनंतर खासदार उदयनराजे यांच्याशी पत्रकारांनी संवाद साधला. मराठा समाजाला आरक्षण मिळवून देण्यासाठी मनोज जरांगे-पाटील (Manoj Jarange-Patil) मुंबईतील आंदोलनावर ठाम आहेत. सरकार (Maharashtra Government) अजूनही मराठा आरक्षणावर तोडगा काढू शकले नाही. यावर खासदार उदयनराजे भोसले यांनी भाष्य केले.

उदयनराजे म्हणाले, ‘‘इतर राज्यांमध्ये आरक्षणाची मर्यादा वाढवण्यात आली आहे. याची आठवण करून देत मराठा समाजाला आरक्षण देण्यासाठी महाराष्ट्रात देखील आरक्षणाची मर्यादा वाढवा. सहज प्रश्न सुटतील. ७० ते ७२ टक्के आरक्षण होऊ द्या. हाच पर्याय आहे; पण जास्त दिवस घोंगडे भिजत ठेवले तर ते वास मारते. जास्त दिवस एखाद्याकडे दुर्लक्ष केले तर चीड येणारच.

ज्यावेळी मंडल आयोग (Mandal Commission) जाहीर केला त्या वेळेस सगळे केले असते तर हा विषय राहिलाच नसता. शिक्षण क्षेत्रामध्ये फीमधील तफावतीमुळे समाजातील मुले त्रासली आहेत. त्यामुळे तज्ज्ञांनी यावर विचार करून तोडगा काढणे आवश्यक आहे. राज्यपातळीवर कुठल्याही समाजाला न दुखावता हा प्रश्न सुटू शकतो.’’

राहुल नार्वेकर यांनी आमदार अपात्रतेसंदर्भात बुधवारी निकाल दिला. या निकालानंतर ठाकरे गटाकडून ते सुप्रिम कोर्टात जाणार असल्याचे जाहीर केले. याच निकालासंदर्भात ही परिस्थिती का निर्माण झाली? याचा विचार करायला हवा, असे म्हणत उद्धव ठाकरे यांना उदयनराजे यांनी टोला लगावला.