एकनाथ शिंदे यांच्या बडानंतर राज्यातील राजकारण चांगलेच तापताना दिसत आहे. एकनाथ शिंदे आणि त्यांच्यासोबतच्या बंडखोर आमदारांना बहुमत सिध्द करण्यासाठी इकडे यावेच लागेल असे शरद पवारांनी म्हटले, यावर भाजपचे नेते आणि केंद्रीय मंत्री नारायण राणे यांनी ट्वीट करत थेट शरद पवारांना इशारा दिलाय. राणे म्हणालेत की, माननीय शरद पवार साहेब या सर्वांना धमक्या देत आहेत, 'सभागृहात येऊन दाखवा', ते येणारच आहेत. ते येणार आणि त्यांच्या मनाप्रमाणे मतदान करणार. त्यांच्या केसालाही धक्का लावल्यास घर गाठणे कठिण होईल, असे नारायण राणे म्हणाले आहेत. (BJP narayan rane on ncp sharad pawar over rebel mla maharashtra political crisis)

एकनाथ शिंदे यांनी केलेल्या बंडामुळे महाविकास आघाडी सरकार टिकणार की नाही हे विधानसभेतील बहुमत ठरवेल आणि सरकार विधानसभेमध्ये बहुमत सिद्ध करेल असा विश्वास शरद पवारांनी व्यक्त केला. यादरम्यान त्यांनी बंडखोर आमदारांना त्यांचे बहुमत सिद्ध करण्यासाठी इकडे यावेच लागेल, तसेच आमदारांना बंडोखोरीचे परिणाम भोगावे लागतील असेही शरद पवार म्हणाले. या वक्तव्यावरून केंद्रीय मंत्री नारायण राणे यांनी ट्वीट करत थेट इशारा दिलाय.

नारायण राणे म्हणाले आहेत की, आघाडी सरकार हे सोयीसाठी व स्वार्थासाठी तयार झालेले सरकार आहे, त्यामुळे कामाच्या व कार्याच्या बढाया मारू नयेत. काहीजणांनी अनेक वेळा बंडखोरी केली. त्या बंडखोरीचा इतिहास उभ्या महाराष्ट्राला माहीत आहे. नको त्या क्षणी नको त्या वयात मान्यवरांना धमक्या देणे शोभत नाही. तसेच त्यांनी संजय राऊतांवर देखील निशाणा साधला, संजय राऊत तुमचे (शिवसेना) किती आमदार राहिलेत? मतदानाची अपेक्षा करू नका, पराभवाची करा, अशी खोचक टीका केली आहे.

नारायण राणे यांनी शरद पवार आणि संजय राऊत यांच्यासोबतच उद्धव ठाकरेंवर देखील निशाणा साधला. ते म्हणाले की, सन्माननीय नगरविकास मंत्री एकनाथ शिंदे हे माझे जुने सहकारी व मित्रही आहेत व त्यांचे सहकारी सरकारमधून बाहेर पडून राज्याबाहेर आहेत. त्यांची संख्या पाहता आताच्या मुख्यमंत्र्यांनी शोभायात्रा काढली, हा पळपुटेपणा व स्वार्थीपणा आहे अशा शब्दात त्यांनी मुख्यमंत्री उद्धव ठाकरे यांच्यावर देखील निशाणा साधला आहे.