मुंबईच्या ग्रँड हयात हॉटेलमध्ये विरोधकांच्या 'इंडिया'युतीची बैठक पार पडली. जेव्हा राहुल गांधी आणि सोनिया गांधी मुंबईच्या हॉटेलमध्ये दाखल झाले, तेव्हा त्यांचे ठिकाणी ढोल-ताशांचा गजरात स्वागत करण्यात आले. मात्र, ग्रँड हयात हॉटेलच्या बाहेर भारतीय जनता युवा मोर्चाच्या कार्यकर्त्यांकडून आंदोलन पुकारण्यात आले. यावेळी राहुल गांधींविरोधात पोस्टरबाजीही करण्यात आली.

स्वातंत्र्यवीर सावरकरांबाबत वादग्रस्त वक्तव्य केल्यामुळे राहुल गांधीं विरोधात भाजप युवा मोर्चातर्फे गुरुवारी आंदोलन पुकारले. इंडिया आघाडीच्या बैठकीसाठी राहुल गांधी मुंबईत दाखल झाले. त्यांचा निषेध नोंदवण्यासाठी भाजप युवा मोर्चाने मुंबई विद्यापीठाच्या मुख्य प्रवेशद्वारासमोर आंदोलनाची हाक दिली.

मुंबई विद्यापीठासमोर आंदोलन करताना भाजपच्या कार्याकर्त्यांकडून मोठ्या प्रमाणात घोषणाबाजी करण्यात आली. यावेळी 'राहुल गांधी वापस जाओ'च्या घोषणा दिल्या गेल्या. स्वातंत्र्यवीर सावरकरांविरोधात त्यांनी वक्तव्य केले, असा या आंदोलकांनी आरोप केला. कार्यकर्ते आक्रमक झाल्यावर पोलिसांनी त्यांची धरपकड सुरु केली आणि त्यांना ताब्यात घेतलं.

मुंबईत होणाऱ्या विरोधकांच्या या बैठकीत समन्वय समिती आणि इंडिया आघाडीच्या लोगोविषयी चर्चा केली जाणार आहे.