मुंबई - राष्ट्रवादी काँग्रेस पक्ष भाजपसोबत गेल्यामुळे राज्याच्या राजकारणात गोंधळाची स्थिती निर्माण झाली आहे. शरद पवार अजुनही भाजपसोबत जाण्यास तयार नसल्याचं सांगण्यात येत असलं तर शरद पवार आणि अजित पवार यांच्यातील गुप्त भेटीमुळे राजकारण तापलं आहे. त्यातच उद्धव ठाकरे गटाला भाजपसोबत जाण्याची ऑफर असल्याचा प्रश्न विचारला असता आदित्य ठाकरे यांनी आपली भूमिका स्पष्ट केली.

तुम्हालाही भाजपची ऑफर आहे, मात्र अजितदादा आणि एकनाथ शिंदेंमुळे तुम्ही जात नाहीत, असा प्रश्न विचारला असता, आदित्य ठाकरे म्हणाले की, मी कधीही ऑफरच्या राजकारणाला महत्त्व देत नाही. मुंबईत येणाऱ्या काळात इंडियाची बैठक होणार आहे. जे देशासाठी लढत आहेत, ते एकत्र आले आहेत. हुकूमशाही सरकारला हाकलून लावायचं असल्याचंही आदित्य ठाकरे म्हणाले.

आदित्य पुढं म्हणाले की, 'सामना'मध्ये पक्षाची भूमिका मांडलेली आहे. सध्याचं राजकारणा लढा प्रामाणिक, एकनिष्ठ आणि दुसऱ्या बाजुला भ्रष्टाचारी लोक तसेच स्वार्थी लोक आहेत. आता लोकांनाच ठरवायचं आहे.