सोलापूर : जुळे सोलापुरातील रेवती सिद्धेश्वर तमशेट्टी (वय ६३) या अमेरिकेतून विमानाने आलेल्या मुलीला आणण्यासाठी मुंबईला गेल्या होत्या. त्यांच्या मुलाचा विवाह आहे. सोमवारी (ता. ११) जाताना त्यांनी घर बंद केले होते; मात्र चोरट्याने त्याच दिवशी मध्यरात्री कुलूप तोडून घरातील नऊ लाख ५७ हजार रुपयांचा ऐवज चोरून नेला. या प्रकरणी विजापूर नाका पोलिसांत गुन्हा दाखल झाला आहे.

मुंबईहून सोलापुरात आल्यानंतर रेवती तमशेट्टी यांना घराचे कुलूप तुटलेले दिसले. घरातील कपाटातील दागिनेही नव्हते. त्यांनी विजापूर नाका पोलिसांना चोरीची माहिती दिली. पोलिस उपायुक्त डॉ. अश्विनी पाटील, सहायक पोलिस आयुक्त राजन माने, दिलीप पवार, शहर गुन्हे शाखेचे वरिष्ठ पोलिस निरीक्षक अरविंद माने, विजापूर नाका पोलिस ठाण्याचे वरिष्ठ पोलिस निरीक्षक दादासाहेब गायकवाड यांनी घटनास्थळी भेट दिली.

पोलिसांनी परिसरातील सीसीटीव्ही कॅमेऱ्यांची पडताळणी केली. त्यात चोरटा एकटाच असल्याचे दिसत आहे. चोरट्याने तमशेट्टी यांच्या घरातून ३० हजार रुपयांची रोकड, पाच तोळ्यांचे सोन्याचे कडे, दहा जोड कर्णफुले (चार तोळे), एक तोळ्याचा नेकलेस, दीड तोळ्याचे लॉकेट, ३० तोळे चांदीचे दागिने (कंबरपट्टा, तोडे, हातातील वाळे, मनगट्या, पैंजण) व ३२ ग्रॅम वजनाच्या सोन्याच्या सात अंगठ्या चोरून नेल्याचे फिर्यादीत नमूद आहे. शहर गुन्हे शाखा व विजापूर नाका पोलिसांची पथके चोरट्याचा शोध घेत आहेत. सहायक पोलिस निरीक्षक शीतलकुमार गायकवाड तपास करीत आहेत.

पहिल्या घरी काही मिळाले नाही म्हणून दुसऱ्या घरात चोरी अन्‌...

चोरट्याने पहिल्यांदा जुळे सोलापुरातील माजी सैनिक नगरातील प्रतिभा रमाकांत आष्टे यांच्या घरात चोरी केली. त्याठिकाणी त्याला केवळ दीड हजार रुपये आणि चांदीचे काही ग्रॅमचे फूलपात्र मिळाले होते. तेथून चोरट्याने गोविंदश्री मंगल कार्यालयाजवळील गीता नगरातील रेवती सिद्धेश्वर तमशेट्टी यांच्या घरी चोरी केली. तेथे चोरट्याला सव्वानऊ लाखांचा ऐवज मिळाला. मोठा ऐवज हाती लागल्यानंतर चोरटा लगेच पसार झाला. त्याच कपाटात दुसरीकडे अडीच-अडीच तोळ्यांच्या चार बांगड्या (१० तोळे) ठेवल्या होत्या. चोरट्याला त्या मिळाल्या नाहीत. तो घाईत तसाच निघून गेला असावा, असे पोलिसांनी सांगितले.