तात्या लांडगे

सोलापूर : सोलापूर शहराची लोकसंख्या १२ लाखांवर, पोलिस ठाणी अवघी सात, अशावेळी प्रत्येक ठिकाणी संबंधित पोलिस ठाण्यातील अंमलदारांना मदतीसाठी वेळेत पोहोचता येत नाही. अशावेळी शासनाच्या ‘डायल ११२’ उपक्रमातून अडचणीतील नागरिकांना अवघ्या ४.३० ते ५ मिनिटांत पोलिसांची मदत मिळू लागली आहे. सोलापूर शहरातील दररोज सरासरी ९० जणांना पोलिस मदत करतात.

सोलापूर शहरात विडी कामगार व ‘एमआयडीसी’तील कारखान्यांमध्ये काम करणाऱ्या कामगारांची संख्या मोठी आहे. बहुतेक कामगारांना बुधवारी सुट्टी असते. त्या दिवशी कौटुंबिक छळासंदर्भात महिलांचे सर्वाधिक कॉल येतात, असेही पोलिसांनी सांगितले. याशिवाय गल्लीत सार्वजनिक रस्त्यावर गोंधळ किंवा हाणामारी सुरू आहे, अपघात झाला आहे, स्पीकरचा आवाज मोठ्याने सोडला आहे, गोमांस तस्करी सुरू असल्यासंदर्भातील देखील कॉल जास्त असतात, असेही पोलिस म्हणाले.

‘डायल ११२’द्वारे अडचणीतील नागरिकांना मदत करणाऱ्या पोलिस गाड्यांना ‘जीपीएस’ बसविले आहे. त्यामुळे कोणती गाडी सध्या कोणत्या परिसरात आहे, त्याचे लोकेशन लगेच समजते. अडचणीतील नागरिकांना तातडीची मदत मिळावी म्हणून जवळच्या गाडीला सांगून तेथे पाठविले जाते. ‘११२’ क्रमांकावर कॉल करण्यासाठी मोबाईलमध्ये बॅलन्स असावा, असे बंधन नाही. अडचणीतील नागरिकांनी मदत मागताना केवळ ठिकाण सांगायचे आहे, जेणेकरून पोलिस घटनास्थळी ४.३० ते ५ मिनिटांत पोहोचू शकतात, असेही पोलिस अधिकाऱ्यांनी सांगितले.

सोलापूर शहर पोलिस राज्यात सातव्या क्रमांकावर

राज्यातील ४५ युनिटमध्ये सोलापूर शहर पोलिस अडचणीतील नागरिकांना मदत करण्यामध्ये सातव्या क्रमांकावर आहेत. शहरातील नागरिकांच्या मदतीसाठी पोलिस अवघ्या साडेचार ते पाच मिनिटात त्याठिकाणी पोचतात. कौटुंबिक कारणातून पती किंवा सासरचे त्रास देत आहेत, असे कॉल अधिक असतात.

- प्रताप पोमण, सहायक पोलिस आयुक्त, सोलापूर शहर

अग्निशामक किंवा रुग्णवाहिकेचीही मदत

११२ या टोल फ्री क्रमांकावरून केवळ पोलिसांचीच मदत नव्हे, तर आता आग लागली किंवा अपघात झाल्यास रुग्णवाहिकेची मदत देखील मिळणार आहे. पण, कोणी मस्करी म्हणून कॉल केल्यास पोलिसांची दिशाभूल केल्याप्रकरणी संबंधित व्यक्तीविरुद्ध कारवाई देखील होऊ शकते.