मुंबई : मागील दोन-तीन पिढ्यांतील शालेय विद्यार्थ्यांच्या आयुष्यात इंद्रधनुष्यातील सप्तरंग भरून त्यांचे जीवन रंगीबेरंगी करणारे कॅम्लिन उद्योगसमूहाचे सर्वेसर्वा सुभाष दांडेकर (वय ८५) यांचे आज सकाळी अल्प आजाराने निधन झाले. त्यांच्या पार्थिवावर शिवाजी पार्क स्मशानभूमीत अंत्यसंस्कार करण्यात आले.

कॅम्लिन फाईन सायन्सेस’चे संस्थापक व ‘कोकुयो कॅम्लीन’चे अध्यक्ष या नात्याने त्यांनी हजारो मराठी तरुणांना रोजगार दिला होता. दांडेकर यांच्या निधनाबद्दल उपमुख्यमंत्री देवेंद्र फडणवीस यांच्यासह अनेक उद्योजक, मान्यवरांनी शोक व्यक्त केला. त्यांच्यामागे मुलगा, मुलगी, भाऊ, पुतण्या तसेच नातवंडे असा परिवार आहे.

त्यांच्या पत्नी रजनी दांडेकर यांचे दोन वर्षांपूर्वी निधन झाले होते. चित्रकलेच्या साहित्याचा उद्योग नावारूपाला आणण्यासाठी दांडेकर यांनी अथक मेहनत घेतली होती. चित्रकलेचे रंग व साहित्य म्हणजे कॅम्लिन, असे समीकरणच १९८० च्या दशकात निर्माण झाले आणि बरेच वर्षे ते कायम होते. त्यामुळे दांडेकर यांच्या निधनामुळे शालेय विद्यार्थ्यांच्या आयुष्यातील इंद्रधनुष्याचे रंगच मावळले, अशी प्रतिक्रिया व्यक्त होत होती.

वडिलांचा वारसा सक्षमपणे चालविला

वडील दिगंबर दांडेकर यांनी कॅम्लिन समूहाची स्थापना केल्यानंतर त्याला आधुनिक रूप देऊन नावारूपाला आणण्यात सुभाष दांडेकर यांचा मोलाचा वाटा होता. १९६० मध्ये इंग्लंडमधून एमएससी केल्यावर त्यांनी या व्यवसायावर लक्ष देण्याचे ठरविले होते.