मुंबई: केंद्रीय मंत्री नारायण राणे (narayan rane) यांनी मुख्यमंत्री उद्धव ठाकरे (uddhav thackeray) यांच्या विरोधात केलेल्या वक्तव्याचे आज तीव्र पडसाद उमटण्याची शक्यता आहे. शिवसैनिकांनी (shivsena) आधीच राणेंविरोधात बॅनरबाजी सुरु केली असून आज राज्यभरात आक्रमक आंदोलन (protest) करण्याची सेनेची रणनीती आहे. दरम्यान नारायण राणे यांची जनआशीर्वाद यात्रा सुरु असून ते सध्या चिपळूणमध्ये आहेत.

चिपळूणमध्ये मोठ्या प्रमाणावर पोलिसांचा फौजफाटा तैनात करण्यात आला आहे. चिपळूणमधील हॉटेल रीम्स येथे नारायण राणे थांबले आहेत. रात्री उशिरा राणे येथे दाखल झाले. सध्या त्यांच्यासोबत त्यांचे पुत्र निलेश राणे आहेत. प्रमोद जठार यांच्यासह भाजपाचे पदाधिकारी शासकीय विश्रामगृहात थांबले असल्याची माहिती आहे. नारायण राणेंचे आज चिपळूणमध्ये काही कार्यक्रम असून ते बाजारपेठेत व्यापाऱ्यांची भेट घेण्याची शक्यता आहे. नुकत्याच झालेल्या महापुरात चिपळूण बाजारपेठेत व्यापाऱ्यांचे मोठे नुकसान झाले होते. त्यांच्याशी राणे आज संवाद साधू शकतात.

कोकणात शिवसेनेचे वर्चस्व आहे. कणकवली विधानसभेची जागा सोडल्यास अन्यत्र शिवसेनेचे आमदार-खासदार आहेत. कोकणात राणेंची राजकीय ताकद कमी झाली असली, तरी त्यांना मानणारा मोठा वर्ग आहे. राणे समर्थकांची संख्या मोठी आहे. त्यामुळे चिपळूणमध्ये राडा होण्याची शक्यता नाकारता येत नाही.

नाशिकमध्ये नगरसेवक सुधाकर बडगुजर यांनी पोलिसात नारायण राणे यांच्याविरोधात तक्रार दाखल केली होती. या तक्रारीनंतर नाशिक पोलिस आयुक्त दीपक पांडे यांनी नारायण राणे यांना अटक करण्यात यावी, असे आदेश काढले आहेत. नाशिक, पुणे आणि महाड येथे नारायण राणेंविरोधात गुन्हे दाखल झाले आहेत. दरम्यान नारायण राणेंकडून अटक टाळण्यासाठी चाचपणी सुरु आहे. वकिलांचा सल्ला घेण्यात येत आहे, अशी माहिती आहे.