मुंबई - राज्यात अकरावीच्या प्रवेशासंदर्भात मुंबई उच्च न्यायालयाने सीईटी रद्दचा निर्णय दिला आहे. त्यानंतर अकरावीची प्रवेश प्रक्रिया कशी होणार असा प्रश्न निर्माण झाला होता. एकीकडे राज्य सरकारने प्रवेश प्रक्रियेसाठी सीईटी जाहीर करून त्यासाठी रजिस्ट्रेशनही सुरु केले. मात्र आता उच्च न्यायालयाने सीईटी रद्द करून प्रवेश दहावीच्या गुणांवरच देण्याचा निर्णय दिला. यावर प्रतिक्रिया देताना राज्याच्या शालेय शिक्षण मंत्री वर्षा गायकवाड यांनी म्हटलं की, न्यायालयाचे स्टेटमेंट आमच्याकडे आलेले नाही. ते हातात आल्यानंतर नेमका निर्णय काय दिलाय हे पाहूनच आम्ही निर्णय घेऊ.

न्यायालायने 28 मे चा आदेश रद्द केला आहे. त्यावेळी म्हटलं आहे की, मुंबई लोकलमध्ये सर्वांनाच प्रवेश नाही मग सीईटी कशी घेणार होता. विद्यार्थ्यांनी प्रवास कसा करायचा असे सवालही न्यायालायने विचारले. निकालाला स्थगिती देण्याची मागणी करणारी याचिका दाखल करण्यात आली होती.

वर्षा गायकवाड यांनी म्हटलं की,'मुलांचे अकरावीचे प्रवेश लवकरात लवकर व्हावेत यासाठी आम्ही प्रयत्न करत आहे. आधीच विद्यार्थ्यांचे नुकसान झाले आहे. आता न्यायालायच्या निर्णयाचा अभ्यास करून त्यानंतर प्रवेशा संदर्भातला निर्णय घेऊ.'