मुंबई - राज्यातील सार्वजनिक बांधकाम विभागाच्या अखत्यारीत असलेल्या महामार्गावर प्रवाशांच्या सोईसाठी 160 ठिकाणी स्वच्छतागृहे बांधण्यात येणार आहेत. त्यांची माहिती गुगल मॅपसारख्या ऍपवरही देण्याची घोषणा सार्वजनिक बांधकाममंत्री चंद्रकांत पाटील यांनी आज केली. 

भारतीय स्त्री शक्ती संघटनेच्या शिष्टमंडळाने वर्षा पवार-तावडे यांच्या नेतृत्वाखाली मंत्रालयात पाटील यांची भेट घेतली. या वेळी शिष्टमंडळाने राज्यातील प्रमुख महामार्गांवर स्वच्छतागृहांची उभारणी करावी, यासह महिला प्रवाशांच्यादृष्टीने आवश्‍यक असलेल्या सुविधांच्या मागण्यांचे निवेदन दिले. त्या वेळी त्यांनी ही घोषणा केली. 

महिला प्रवाशांसाठी महामार्गावरील स्वच्छतागृहांमध्ये सॅनिटरी नॅपकिन्स व्हेडिंग मशीन आणि सॅनिटरी पॅडची विल्हेवाट लावण्यासाठी इन्सिनेटर ठेवण्याच्या मागणीचा यामध्ये समावेश होता. पाटील यांनी ही मागणी मान्य करत, महामार्गावरील स्वच्छतागृहांमध्ये याची व्यवस्था करण्यात येईल, असे आश्वासन दिले. 

या वेळी सार्वजनिक बांधकाम विभागाचे सचिव (रस्ते) सी. पी. जोशी, उपसचिव पी. के. इंगोले, संघटनेच्या उपाध्यक्षा सीमा देशपांडे, मुंबई विभागाच्या सचिव सुरेखा किणगावकर, अर्चना बक्षी, मंजू नायर आदी उपस्थित होते.