Chandrayan-3 landed successfully on moon

मुंबई- चांद्रयान-३ चंद्राच्या दक्षिण ध्रुवावर यशस्वीरीत्या उतरल्याने संपूर्ण भारत आनंद साजरा करत आहे. राष्ट्रवादीचे प्रमुख शरद पवार आणि सुप्रिया सुळे यांनी मुंबईतील नेहरू तारांगण येथे चांद्रयान-3 लँडिंग कार्यक्रमाचे थेट प्रक्षेपण पाहिले. शरद पवार यांनी इस्त्रोच्या शास्त्रज्ञांचे अभिनंदन केले. तसेच भारताचे पहिले पंतप्रधान पंडित जवाहरलाल नेहरु यांचा उल्लेख करत त्यांच्यामुळे हे शक्य झाल्याचं ते म्हणाले.

नेहरू तारांगण येथून मला हा क्षण पाहायला मिळाला याचा आनंद आहे. पंडित जवाहरलाल नेहरु यांनी सुरुवातीच्या काळात विज्ञान आणि तंत्रज्ञानाच्या क्षेत्रात देश पुढे जावा यासाठी इस्त्रोसह अन्य संस्थांची स्थापना केली. त्यांनी जे प्रयत्न केले त्यांच्या प्रयत्नांचे आज चीज झाल्याचं मला वाटतं. इस्त्रोच्या शास्त्रज्ञांचे मी अभिनंदन करतो. त्यांनी जगाला दाखवलं की, भारत एक पुढे जाणारा देश आहे, असं ते म्हणाले.

चंद्राच्या दक्षिण भागात यान उतरवणारा भारत पहिला देश आहे. तर चंद्रावर जाणारा भारत जगात चौथा देश आहे. २०१९ मध्ये भारताने चंद्रावर चांद्रयान-२ पाठवला होता. पण, मोहीम अयशस्वी ठरली होती. यावर बोलताना पवार म्हणाले की, यश-अपयश येत असतं, यश मिळाल्यावर आपले पाय जमिनीवर ठेवावे लागतात. आपल्या वैज्ञानिकांनी अपयश आल्यामुळे उमेद सोडली नाही.

भारतीय शास्त्रज्ञांनी दाखवून दिले की, भारत हा पुढे जाणारा देश आहे. नाउमेद होणारा देश नाही. पंडित जवाहरलाल नेहरु यांनी वैज्ञानिकांना प्रोत्साहन दिले. विज्ञान आणि तंत्रज्ञान याचा विकास होण्यासाठी त्यांनी प्रयत्न केले. नेहरुंच्या प्रयत्नांचं आज चीज झालं. मी वैज्ञानिकांना शुभेच्छा आणि धन्यवाद देतो, असं पवार म्हणाले. (Latest Marathi News)