Chhagan Bhujbal : ओबीसींच्या हक्कासाठी मंत्री छगन भुजबळ यांनी वेगळी भूमिका घ्यावी, अशी मागणी समता परिषदेच्या बैठकीमध्ये कार्यकर्त्यांनी केल्याची सूत्रांची माहिती आहे. मागे जेव्हा मनोज जरांगे पाटील यांचं आंदोलन चर्चेत होतं, तेव्हाही भुजबळांनी ठाम भूमिका घ्यावी अशी मागणी विरोधी गटाकडून होत होती.

मंत्री छगन भुजबळ यांच्या उपस्थितीमध्ये सोमवारी समता परिषदेची बैठक झाली. बैठकीमध्ये ओबीसी, मराठा आंदोलन, सगेसोयऱ्यांची अंमलबजावणी, पार पडलेल्या लोकसभा निवडणुका या मुद्द्यांवर चर्चा झाली. महत्त्वाचं म्हणजे देशात जातनिहाय जनगणना व्हावी, अशी मागणी पंतप्रधानांकडे करणार असल्याचं भुजबळांनी बैठकीनंतर सांगितलं.

बैठकीमध्ये कार्यकर्त्यांनी भुजबळांकडे वेगळी भूमिका घेण्याची मागणी केल्याचं कळतंय. 'साम टीव्ही'ने सूत्रांच्या हवाल्याने हे वृत्त दिले आहे. वेगळी भूमिका म्हणजे सरकारमधून बाहेर पडून ओबीसींसाठी लढा उभा करावा, अशी आहे का? असा प्रश्न उपस्थित होतोय.

बैठकीनंतर बोलताना छगन भुजबळ म्हणाले की, बिहार सरकारने ज्याप्रमाणे जातीनिहाय जनगनणा केली आहे, तसा सर्व्हे महाराष्ट्रातदेखील व्हायला पाहिजे. त्यासाठी पंतप्रधान नरेंद्र मोदी यांच्याकडे मागणी करणार आहे.

जातीनिहाय जनगणना केली तर...

जातीनिहाय जनगणना केली तर ओबीसींची संख्या आणि त्यांची परिस्थिती यांचा अंदाज येण्यास मदत होईल. केंद्र सरकारकडून एससी, एसटीला जसे वेगवेगळे फंड मिळतात, तसे फंड ओबीसींनाही मिळू शकतील. त्यामुळे हा सर्व्हे भारत सरकारकडून व्हायला पाहिजे, असंही भुजबळ म्हणाले.