परभणी - ‘मला तुरुंगात डांबले याची खंत नाही. खोटे आरोप लावणाऱ्यांनो, तुम्ही काही संत नाहीत. फुले-शाहू-आंबेडकरांच्या महाराष्ट्रात आहात, हे विसरू नका,’ असे राष्ट्रवादी काँग्रेसचे ज्येष्ठ नेते, माजी उपमुख्यमंत्री छगन भुजबळ यांनी सुनावले. सरकारने आमच्या कुटुंबाचा नाहक छळ केला असून, महाराष्ट्र सदन बांधणाऱ्या कंत्राटदाराला अद्याप एकही रुपया दिलेला नसताना घोटाळा झाला कसा म्हणता, असा प्रश्न करीत त्यांनी राज्य सरकारवर टीकास्त्र सोडले.

अखिल भारतीय महात्मा फुले समता परिषदेच्या वतीने शुक्रवारी (ता. २५) येथे बहुजन जागृती समता मेळावा झाला. त्यावेळी भुजबळ बोलत होते. राष्ट्रवादीचे जिल्हाध्यक्ष आमदार बाबाजानी दुर्राणी, महापौर मीना वरपूडकर, माजी मंत्री सुरेश वरपूडकर, आमदार रामराव वडकुते, आमदार विजय भांबळे, माजी खासदार सुरेश जाधव, ॲड. गणेशराव दुधगावकर आदी उपस्थित होते.

भुजबळ म्हणाले, मला तुरुंगात का टाकले हे मला आणि ज्यांनी टाकले त्यांनाही अजून माहीत नाही. महाराष्ट्र सदन बांधकामातील गैरव्यवहाराचे आरोप माझ्यावर करण्यात आले, त्या बांधकामाचे कंत्राट मी नव्हे, तर तत्कालीन मुख्यमंत्री विलासराव देशमुख यांच्या मंत्रिमंडळाने दिले होते. माझी केवळ त्या खात्याचा मंत्री म्हणून भूमिका होती. सदन बांधून चार ते पाच वर्षे उलटली असताना अद्याप कंत्राटदाराला एक रुपयाही दिलेला नाही. त्यामुळे माझ्यावरचा आरोप बिनबुडाचा आहे. 

नरेंद्र मोदी, उद्धव ठाकरेंवर टीका
देशात अराजकता माजली असल्याचे सांगत भुजबळ यांनी पंतप्रधान नरेंद्र मोदींच्या भाषणाची नक्कल करीत त्यांच्यावर टीका केली. पहारेकरी चोर आहेत, असे म्हणता तर त्यांच्या मांडीला मांडी लावून का बसता, अशी विचारणा करीत त्यांनी शिवसेना पक्षप्रमुख उद्धव ठाकरे यांच्यावरही तोफ डागली. चारा छावण्यांची मागणी केली असता, दिल्या काय तर, लावण्या, असे म्हणत त्यांनी सार्वजनिक बांधकाममंत्री चंद्रकांत पाटील यांचाही समाचार घेतला.

कपडे सोडून सगळे जप्त केले
तुरुंगात टाकल्यानंतर चौकशीच्या नावाखाली भुजबळ कुटुंबाचा अतोनात छळ करण्यात आला. कपडे सोडून सगळे काही जप्त केले, असा आरोप छगन भुजबळ यांनी केला. तुम्ही कितीही दादागिरी करून संपवायला निघालात तरी भुजबळ संपणार नाही, हे ध्यानात घ्या, असेही ते म्हणाले. यावेळी भुजबळ यांनी मनुस्मृती ग्रंथाचे दहन केले.