शिंदे गटातील वारंवार वादग्रस्त वक्तव्ये करणारे मंत्री आणि आमदार हे आत्ताच्या घडीला मुख्यमंत्री एकनाथ शिंदें यांच्यासाठी डोकेदुखी बनलेत. मंत्री तानाजी सावंत यांनी आरक्षणाबाबत केलेल्या मोठ्या वादग्रस्त वक्तव्यामुळे राजकारण चांगलेच तापले आहे. दरम्यान शिंदे गटातील अनेक आमदार विरोधी पक्षांवर टीका करताना वादग्रस्त वक्तव्ये करताना दिसतात. याच बेजबाबदार बोलण्याला आवर घालण्यासाठी मुख्यमंत्री एकनाथ शिंदें यांनी आमदार आणि मंत्र्यांना दम भरला आहे.

शिंदे गटाची महत्वाची बैठक पार पडली. यावेळी बैठकीत एकनाथ शिंदेंनी वादग्रस्त वक्तव्ये करणाऱ्या मंत्र्यांवर आणि आमदारांवर नाराजी व्यक्त केली आहे. मी बोलत नाही तरी तुम्ही का एवढं बोलता? असा प्रश्नही मुख्यमंत्री एकनाथ शिंदें यांनी बेजबाबदारपणे बोलणाऱ्या मंत्र्यांना आणि आमदारांना विचारला आहे. वादग्रस्त वक्तव्ये करणाऱ्या आमदारांचे आणि मंत्र्यांचे कान मुख्यमंत्र्यांनी या बैठकीत टोचले आहेत.

पक्षाच्या चिन्हाबाबत विनाकारण बोलू नका. त्याचबरोबर वादग्रस्त वक्तव्य करु नका अशा सूचनाही मुख्यमंत्र्यांनी आमदार आणि मंत्र्यांना दिल्या आहेत. शिंदे गटाचे मंत्री हे सातत्याने विरोधकांवरती विशेषत: शिवसेनेवर जास्त प्रमाणात टीका करत असतात. राजकारणाच्या सद्य परिस्थितीत त्यांनी केलेली वक्तव्ये चर्चेचा विषय ठरत आहेत.

दरम्यान, यापूर्वी उपमुख्यमंत्री देवेंद्र फडणवीस यांनीही शिंदे गटातील मंत्र्यांच्या बेजबाबदार वक्तव्याबाबत नाराजी व्यक्त केली होती. देवेंद्र फडणवीस यांनी मंत्री मंडळ बैठकीतच कृषिमंत्री अब्दुल सत्तार यांना झापले होते. अब्दुल सत्तार यांनी राज्य सरकारच्या काही महत्त्वाच्या निर्णयांबाबत परस्पर जाहीर वक्तव्य केल्यामुळे उपमुख्यमंत्री फडणवीस चांगलेच संतापले होते. मंत्रीमंडळ बैठकीत उपमुख्यमंत्री देवेंद्र फडणवीस यांनी कृषिमंत्री अब्दुल सत्तार यांना खडसावले होते.