मुंबई - शिवसेनेतील बंडानंतर पक्षप्रमुख उद्धव ठाकरे आणि युवानेते आदित्य ठाकरे यांनी राज्यभर दौरे सुरु केले आहेत. त्यातच मुंबई महापालिकेच्या निवडणुका विचारात घेत मुंबई, ठाणे परिसरातील शिवसैनिकांना एकसंध ठेवण्याचा एककलमी कार्यक्रम त्यांनी हाती घेतला आहे. आदित्य ठाकरे यांच्या दौऱ्यांना राज्यभर शिवसैनिकांकडून मिळत असलेला प्रतिसाद पाहून शिंदे गटामध्ये मोठ्या प्रमाणात अस्वस्थता पसरली आहे. त्यामुळे शिंदे गटाकडून मुख्यमंत्री एकनाथ शिंदे यांच्या राज्यव्यापी दौऱ्याची तयारी करण्यात येत आहे.

पुण्यात आदित्य ठाकरे यांच्या दौऱ्यादरम्यान शिंदे गटाचे आमदार उदय सामंत यांच्या गाडीवर संतप्त शिवसैनिकांकडून झालेला हल्ला पाहता सामान्य शिवसैनिक आजही उद्धव ठाकरे यांच्यासोबत असल्याचे शिंदे गटाला वाटते. आदित्य ठाकरे यांना कोकण दौऱ्यातही चांगलाच प्रतिसाद मिळाला आहे. दीपक केसरकर यांच्या मतदारसंघात त्यांच्या सभेला गर्दी झाल्याने शिंदे गटाचे आमदार हवालदिल झाले आहेत.