हळदी सभारंभात डीजेवर नाचताना धक्का लागल्यामुळे दोन गटांमध्ये वाद झाल्याची घटना भिवंडी शहरात घडली आहे. धारदार शस्त्र, लोखंडी रॉड, फरशीने एकमेकांवर हल्ला करत वाद झाल्याची घटना समोर आली आहे. ही घटना भिवंडी शहरातील अंजूर फाटा येथील साठे नगरमधील एका लग्नाच्या मंडपात घडली आहे. (Latest Marathi News)

या घटनेप्रकरणी नारपोली पोलीस ठाण्यात दोन्ही गटाकडून एकमेकांविरोधात गुन्हा दाखल करण्यात आला आहे. लखन जाधव, कैलास धोत्रे, दिनेश मोरे, संदीप उदमेले, राजू गुंजाळ ( सर्व रा.साठेनगर भिवंडी ), संजय जाधव ,अक्षय जाधव (दोघे रा.फेणेगाव,कामतघर) अशी एकमेकांविरोधात गुन्हा दाखल केलेल्या तरुणांची नावे आहेत. तर संजय जाधव, अक्षय जाधव, दिनेश मोरे व अजय चव्हाण अशी गंभीर जखमी झालेल्यांची नावे आहेत.(Marathi Tajya Batmya)

पोलिसांनी दिलेल्या माहितीनुसार, संजय जाधव यांच्या नातेवाईकाकडे हळदी सभारंभ होता. त्यावेळी संजय हा त्याचे मित्र अक्षय आणि राजू यांच्या सोबतीने हळदी सभारंभाला आला होता. याच दरम्यान परिसरात हळदीचा कार्यक्रम असल्याने दुसऱ्या गटातील दिनेश हा त्याचे मित्र लखन, कैलास, संदीप यांच्यासोबत आला होता.

यावेळी हळदीनिमित्ताने बँड आणि डीजेच्या तालावर काही तरुण नाचत होते. नाचताना एकमेकांना धक्का लागल्यामुळे किरकोळ वाद झाला. याच रूपांतर मोठ्या वादात झालं. त्यावेळी भांडण सोडवण्यासाठी आलेल्या दिनेशच्या आत्यालाही विरोधी गटातील संजय आणि अक्षयने शिवीगाळ केली.(Latest Maharashtra News)

या भांडणाचे रुपांतर हाणामारीत झालं. या वादात धारदार शस्त्र, लोखंडी रॉड, फरशीने दोन गटात जोरदार हाणामारी झाली. यामध्ये संजय, अक्षय, दिनेश आणि अजय हे चौघेही गंभीर जखमी झाले असून त्यांच्यावर येथील रुग्णालयात उपचार सुरू आहेत. याप्रकरणी परस्परविरोधी नारपोली पोलीस ठाण्यात गुन्हा दाखल करण्यात आला असून घटनेचा पुढील तपास पोलीस करीत आहेत.