Dasara Melawa:शिवसेनेकडून दरवर्षी दसऱ्याच्या दिवशी 'दसरा मेळावा' घेतला जातो. ठाकरे गट आणि शिंदे गटाकडून दसरा मेळाव्याच्या तयारीला सुरुवात करण्यात आली आहे. दसरा मेळाव्याच्या तयारीसाठी मुख्यमंत्री एकनाथ शिंदे यांनी बैठक घेतली. या बैठकीला शिवसेनेचे महत्वाचे खासदार, आमदार, नेते उपनेते आणि पदाधिकाऱ्यांनी हजेरी लावली होती. दसरा मेळाव्याच व्यवस्थापन करण्यासाठी ही बैठक बोलावण्यात आली होती.

या बैठकीत पदाधिकाऱ्यांना त्यांच्या जबाबदाऱ्या वाटून देण्यात आल्या. मेळाव्याला जास्तीत जास्त गर्दी व्हावी यासाठी शिंदे गटाकडून प्रयत्न करण्यात येत आहेत. त्यासाठी मुख्यमंत्री एकनाथ शिंदे यांनी कार्यकर्त्यांना मार्गदर्शन केलं. शिंदे गटाकडून सभेसाठी दोन मैदानांची निवड करण्यात आली होती. त्यापैकी कोणत्या मैदानावर सभा घ्यायची, यावर देखील चर्चा करण्यात आली.

शिवसेनेत फूट पडण्याआधी दसरा मेळावा शिवाजी पार्क याठिकाणी घेतला जात होता. पक्षफुटीनंतर दोन वेगवेगळे मेळावे घेतले जाऊ लागले. यावर्षी शिवाजी पार्कवर मेळावा घेण्यासाठी ठाकरे गट आणि शिंदे गट आग्रही होते. त्यानंतर शिंदे गटाने माघार घेतल्यामुळे ठाकरे गटाला शिवाजी पार्कवर 'दसरा मेळावा' घेण्याची परवानगी मिळाली.

त्यानंतर शिंदे गटाने मेळावा घेण्यासाठी दोन मैदानांना पसंती दिली होती. यामध्ये चर्चगेटच्या क्रॉस मैदानाचा समावेश होता. यंदा दसरा मेळाव्यात शिंदे गट आणि ठाकरे गटात चढाओढ बघायला मिळू शकते. (Latest Marathi New)