मुंबई : सततच्या दौऱ्यामुळे मुख्यमंत्री एकनाथ शिंदे यांच्या प्रकृतीत बिघाड झाल्यामुळे सर्व प्रशासकीय बैठका आणि दौरे रद्द करण्यात आले आहेत. राज्यात सुरू असलेले पाहणी दौरे आणि बैठका यामुळे त्यांना थकवा जाणवत असून डॉक्टरांनी त्यांना आरामाचा सल्ला दिला असल्यामुळे त्यांच्या आजच्या सर्व प्रशासकीय बैठका रद्द करण्यात आल्या आहेत.

दरम्यान, शिंदे गटाचा आणि शिवसेनाच्या वाद सध्या सुप्रीम कोर्टात गेला असून यावर आता येत्या सोमवारी म्हणजेच ८ ऑगस्ट रोजी सुनावणी होणार आहे. त्यामुळे शिवसेना आणि पक्षचिन्ह नेमकं कुणाचं आणि खरी शिवसेना कोणती असा वाद कायम राहिला आहे.

दरम्यान, हे सरकार स्थापन झाल्यावर मुख्यमंत्री एकनाथ शिंदे यांनी अनेक दौरे आणि बैठका घेतल्या आहेत. त्याचबरोबर पहाटेपर्यंतच्या सभा, पूरग्रस्त भागाची पाहणी आणि प्रवास या सर्व कामामुळे त्यांना थकवा आला असून त्यांची तब्येत बिघडली आहे. त्यामुळे डॉक्टरांकडून त्यांना आरामाचा सल्ला देण्यात आला आहे. त्यामुळे आज राज्यात होणाऱ्या सर्व प्रशासकीय बैठका आणि सभा रद्द करण्यात आल्या आहेत.