बंड करताना थोडा जरी दगाफटका झाला असता तरी शहीद होण्याचा धोका होता, असं खळबळजनक विधान मुख्यमंत्री एकनाथ शिंदे यांनी केलं आहे. मुख्यमंत्री शिंदे सातारा जिल्ह्यातल्या त्यांच्या मूळ गावी गेले आहेत. यावेळी त्यांचं गावात जोरदार स्वागतही करण्यात आलं. लोकांच्या आणि देवीच्या आशिर्वादानं सगळं काही सुरळीत झालं, असंही शिंदे म्हणाले.

मुख्यमंत्री पदाची शपथ घेतल्यानंतर पहिल्यांदाच शिंदे सातारा जिल्ह्यातल्या दरे या आपल्या मूळ गावी आले होते. त्यावेळी त्यांनी पद्मावती मंदिरात देवीचं दर्शन घेतलं आणि ग्रामस्थांशी संवाद साधला. यावेळी बोलताना शिंदे म्हणाले की, बंड करताना थोडा जरी दगाफटका झाला असता तरी शहीद होण्याचा धोका होता. लोकांच्या आणि देवीच्या आशिर्वादाने सगळं काही सुरळीत झालं.

मंत्रिमंडळाचा विस्तार झाला, आता खातेवाटप कधी याबद्दलही एकनाथ शिंदेंनी यावेळी बोलताना स्पष्टपणे सांगितलंय. शिंदे म्हणाले की, मंत्रिमंडळ विस्तार कधी होणार, असं विचारलं जात होतं. तो झाला. त्याप्रमाणे आता खातेवाटपही होईल. लवकरच सगळ्या गोष्टी होतील. त्या वेळेवरच होतील. पण आम्ही कुठेही विकासाची कामं थांबू दिलेली नाहीत. कालच आम्ही अतिवृष्टीमुळे शेतकऱ्यांच्या झालेल्या नुकसानावर भरघोस अशी मदत दिलीय. एनडीआरएफच्या नियमाच्याही दुप्पट नुकसानभरपाई देण्याचा निर्णय घेतलाय. २ हेक्टरची मर्यादा होती, ती वाढवून तीन हेक्टर केलीय, असे अनेक निर्णय आम्ही महिन्याभराच्या काळात घेतलेत.