मुंबई - मागील काही दिवसांपूर्वी पंतप्रधान नरेंद्र मोदी (Narendra Modi) यांनी लोकसभेत केलेल्या भाषणाचे पडसाद राज्यभर उमटत आहेत. या पार्श्वभूमीवर राज्यभरात कॉंग्रेस पक्षातील नेत्यांनी आक्रमक पवित्रा घेतला आहे. पंतप्रधानांनी केलेले विधान महाराष्ट्राची बदनामी करणारं असून त्यांनी माफी मागायला हवी अशी भूमिका राज्यातील काँग्रेसनेत्यांनी घेतला आहे. गेल्या आठवड्यात नागपुरात केंद्रीय मंत्री नितीन गडकरी यांच्या घरासमोर काँग्रेस कार्यकर्त्यांनी अशाच प्रकारे आंदोलन केले होते.

दरम्यान, राज्यातील प्रमुख भाजपा नेत्यांच्या घरासमोर आंदोलन करु असं प्रदेशाध्यक्ष नाना पटोलेंनी म्हटलं होतं. या पार्श्वभूमीवर विरोधी पक्षनेते देवेंद्र फडणवीस (Devendra Fadnavis) यांच्या सागर बंगल्याबाहेर आज काँग्रेस कार्यकर्ते पोहचले आहेत. त्याचवेळी काँग्रेस प्रवक्ते गनिमी काव्याने आलेल्या अतुल लोंढेंना पोलिसांनी घेतलं ताब्यात घेत तोंडही दाबलं आहे. त्यामुळे कार्यकर्ते आणखीनच आक्रमक झाले. यावेळी त्यांनी आंदोलनाचा इशारा घेतला. दरम्यान, भाजपा कार्यकर्तेही फडणवीसांच्या घराबाहेर जमले. भाजपा कार्यकर्त्यांचीही पोलिसांना धरपकड सुरु केली आहे. पोलिसांनी सागर बंगल्याकडे जाणारे रस्ते दोन्ही बाजूने बंद केले आहे. या परिसरात आंदोलन सुरु असून कॉंग्रेस कार्यकर्त्यांना पोलिसांनी ताब्यात घेतले आहे.

काय म्हणाले आहेत नाना पटोले

देशाचे पंतप्रधान नरेंद्र मोदी संसदेत कसे भाषण करतात? त्यांना जनता कधीही माफ करणार नाही. मोदींनी छत्रपती शिवाजी महाराजांचा अपमान केला, तेव्हा भाजपाचे सदस्य बाके वाजवत होते. आम्ही देवेंद्र फडणवीसांच्या घरापुढे आंदोलन करणारच. नरेंद्र मोदी यांनी माफी मागायला हवी अशी आमची मागणी आहे असं नाना पटोले म्हणाले.