मुंबई : राष्ट्रवादी पक्षाचे अध्यक्ष शरद पवार यांनी राष्ट्रवादीच्या राष्ट्रीय अध्यक्षपदावरून निवृत्तीची घोषणा केली आहे. त्यांच्या या घोषणेनंतर कार्यकर्त्यांनी मोठा गोंधळ केला असून हा निर्णय मागे घेण्यासाठी विनंती केली. तर छगन भुजबळ, जयंत पाटील, जितेंद्र आव्हाड, दिलीप वळसे यांच्या सारख्या बड्या नेत्यांना यावेळी अश्रू अनावर झाले आहेत. यानंतर काँग्रेसचे जेष्ठ नेते अशोक चव्हाण यांनी आपली प्रतिक्रिया व्यक्त केली आहे.

"काँग्रेस पक्ष हा राष्ट्रवादी पक्षाच्या सर्व घडामोडींवर लक्ष ठेवून आहे. पण सध्या राज्यात चाललेलं राजकारण बघता शरद पवार यांनी निवृत्तीची घोषणा करणे हे कुठेतरी खटकते. पण त्यांच्या पक्षाचा हा अंतर्गत पक्ष आहे. केंद्र पातळीवर सर्व पक्ष एकत्र येऊन भाजपविरोधात मोठी फळी तयार करत असताना शरद पवारांचा असा निर्णय न पटणारा आहे." असं अशोक चव्हाण म्हणाले.

"अनुभवी नेता जर बाहेर पडला तर नुकसान होईल म्हणून पक्षात त्याचं राहणं गरजेचं आहे. त्या समितीने शरद पवारांना पुन्हा पक्षात राहण्यासाठी प्रयत्न करावेत अशी माझी विनंती आहे. पण हा त्यांचा अंतर्गत विषय आहे." असं मत काँग्रेसचे जेष्ठ नेते अशोक चव्हाण यांनी व्यक्त केलं आहे.

दरम्यान, शरद पवार यांचे आत्मचरित्र असलेले "लोक माझे सांगाती" या आत्मचरित्राच्या सुधारित आवृत्तीचा प्रकाशन सोहळा मुंबईत पार पडला. यावेळी भाषण करताना शरद पवार यांनी राष्ट्रवादीच्या अध्यक्षपदावरून निवृत्ती घेत असल्याची घोषणा केली आहे. त्याचबरोबर यापुढे निवडणूक लढवणार नसल्याचीही त्यांनी घोषणा केली. त्यांच्या या मोठ्या निर्णयानंतर चर्चा सुरू झाल्या आहेत.