गेल्या काही दिवसांपासून काँग्रेस पक्षातील अंतर्गत वाद चव्हाट्यावर आले आहेत. ज्येष्ठ नेते बाळासाहेब थोरात आणि प्रदेशाध्यक्ष नाना पटोले यांच्यातील वाद दिवसेंदिवस वाढत चालल्याचे दिसून येत आहे. दरम्यान, राजकीय वर्तुळातून मोठी माहिती समोर आली आहे. काँग्रेस अशोक चव्हाणांना मोठी जबाबदारी देण्याच्या तयारीत असल्याचे सांगण्यात येत आहे.

रविवारी काँग्रेसचे ज्येष्ठ नेते बबनराव तायवाडे यांच्या वाढदिवसानिमित्त एक कार्यक्रम आयोजित करण्यात आला होता. या कार्यक्रमाला पक्षाचे ज्येष्ठ नेते आणि माजी मंत्री सुनील केदार यांनी उपस्थिती लावली होती. यावेळी सुनिल केदार यांनी केलेल्या वक्तव्याने सर्वांच्याच भुवय उंचावल्या आहेत.

अशोक चव्हाण मोठ्या मनाचा माणूस आहे. ते आमचा आधारस्तंभ आहेत. आम्ही त्यांना मोठ्या श्रद्धेने पाहत आलो आहोत आणि पाहत राहू. ते कितीही नाही बोलले तरी आम्ही जबरदस्ती करू. केदार यांच्या या वक्तव्यानंतर राज्यात चर्चेला उधाण आलं आहे.

सुनील केदार चव्हाणांना कोणती नवी जबाबदारी देणार आहेत? पटोलेंच्या जागी चव्हाणांना प्रदेश काँग्रेस अध्यक्ष बनवायचे आहे का? असे अनेक प्रश्न उपस्थित होत आहेत.

यापूर्वी झाली होती चर्चा

अशोक चव्हाण यांना अध्यक्ष करण्याच्या चर्चेची पहिलीच वेळ नाही. नुकतेच चव्हाणांच्या नाराजीचे वृत्त समोर आले होते, त्यानंतरही पटोले यांच्याऐवजी चव्हाण यांना प्रदेश काँग्रेस अध्यक्ष केले जाऊ शकते, अशी चर्चा जोर धरू लागली. मात्र, भारत जोडो यात्रेनंतर या चर्चांना पूर्णविराम मिळाला. दुसरीकडे, केदार यांनी चव्हाण यांच्याबाबत ज्या पद्धतीने कौतुक केले, त्यामुळे पुन्हा एकदा चर्चेला उत आला आहे.