मुंबई : वेदांता-फॉक्सकॉन प्रकल्प गुजरातला गेल्यामुळे राज्यातील राजकारण चांगलच तापलं आहे. विरोधी पक्षातील नेत्यांकडून राज्यातीस शिंदे फडणवीस सरकारवर जोरदार टीका केली जात आहे. विरोधीपक्षनेते अजित पवार यांनी गुजरातला गेलेला वेदांता- फॉक्सकॉन प्रकल्प महाराष्ट्रात परत आणण्याची मागणी मुख्यमंत्र्यांकडे केली आहे केली, यादरम्यान कॉंग्रेसचे प्रदेशाध्यक्ष नाना पटोले यांनी 'याचसाठी केला होता अट्टाहास!' अशा शब्दात शिंदे फडणवीस सरकारवर बोचरी टीका केली आहे.

महाराष्ट्रात येणारा वेदांता-फॉक्सकॉनचा सेमीकंडक्टर निर्मिती उद्योग प्रकल्प गुजरातमध्ये गेल्याने नाराजी व्यक्त करण्यात येत आहे. यादरम्यान कॉंग्रेसचे नेते नाना पटोले यांनी ट्विट केलं आहे, यामध्ये त्यांनी म्हटले आहे की, "प्रस्थापित मविआ सरकार पाडून, सुरत-गुवाहाटी फिरून, हिंदुत्वाचा बनावटी चेहरा घेऊन ईडी सरकार सत्तेत आले. आणि आमच्या सरकारच्या काळात मंजूर झालेला फॉक्सकॉन-वेदांता हा इतका मोठा महाराष्ट्रातील प्रकल्प आता गुजरातला हलवण्यात आला आहे."

पुढे त्यांनी महाराष्ट्रीत एक लाख नोकऱ्या गुजरातला गेल्याचा उल्लेख केला आहे, ते म्हणाले की, "यामुळे महाराष्ट्रात निर्माण होणाऱ्या सुमारे 1 लाख नोकऱ्या गुजरातच्या घशात गेल्या आहेत. मुख्यमंत्री एकनाथ शिंदे म्हणाले की त्यांना मोदी- शहा यांचा हस्तक होणे मंजूर आहे, ते याचसाठी का??" असा सवाल देखील त्यांनी मुख्यमंत्री एकनाथ शिंदे यांना केला आहे.

एकनाथ शिंदे काय म्हणाले होते?

शिंदे गट हा पंतप्रधान मोदी, अमित शाह यांचे हस्तक असल्याची टीका शिवसेनेकडून केली जाते. या टीकेला उत्तर देताना पण याकुब मेमन आणि दाऊदचे हस्तक होण्यापेक्षा ज्यांनी बाळासाहेब ठाकरे यांचे विचार पुढे नेले, कलम ३७० रद्द केले त्या नरेंद्र मोदी आणि अमित शाह यांचे हस्तक होणे, हे केव्हाही बरे आहे. गद्दार आणि देशद्रोही लोकांचा हस्तक होण्यापेक्षा आम्ही मोदी-शाहांचे हस्तक होणार असू, तर ते आम्हाला चालेल, असे वक्तव्य मुख्यमंत्री एकनाथ शिंदे यांनी औरंगाबाद येथे बोलताना केले होते. दरम्यान एकनाथ शिंदे यांच्या या विधानाचा समाचार नाना पटोले यांनी घेतला आहे.