मुंबई- महाराष्ट्रात कोरोनास्थिती गंभीर बनताना दिसत आहे. गेल्या काही दिवसांपासून कोरोना रुग्णांची संख्या 50 हजारांच्या पुढे आढळून येत आहे. गेल्या 24 तासांत महाराष्ट्रात कोरोनाचे 56 हजार 286 नवीन रुग्ण आढळून आले आहेत, तर 36 हजार 130 लोकांनी कोरोनावर मात केली असून त्यांना घरी सोडण्यात आले आहे. कोरोना विषाणूमुळे मृत्यू झालेल्यांची संख्याही वाढताना दिसत आहे. गेल्या 24 तासांत राज्यात 376 रुग्णांचा कोरोना विषाणूमुळे मृत्यू झाला आहे. कोरोना रुग्णांची आतापर्यंतची संख्या 32 लाख 29 हजार 547 झाली आहे. राज्यात सध्या कोरोनाचे  5 लाख 21 हजार 317 सक्रिय रुग्ण आहेत. राज्यात आतापर्यंत 26 लाख 49 हजार 757 रुग्णांनी कोरोनावर मात केली आहे. राज्यात कोरोना विषाणूमुळे आतापर्यंत  57 हजार 028 रुग्णांचा मृत्यू झालाय. आरोग्य मंत्रालयाने यासंदर्भातील माहिती दिली आहे

राज्यात कोरोनाबाधित रुग्णांची संख्या वाढत आहे. कोरोनावर मात करण्यासाठी लसीकरण हाच एकमेव पर्याय आहे. राज्यात लसीकरणाने गती घेतलीये. पण, राज्यात कोरोना लशींची कमतरता जाणवत आहे. आरोग्य मंत्रालयाने दिलेल्या माहितीनुसार राज्यात पुढील काही दिवस पुरेल इतकाच कोरोना लशींचा साठा आहे. केंद्र सरकार कोरोना लशींचा पुरवठा करण्याबाबत दुजाभाव करत असल्याचा आरोप राजेश टोपे यांनी केला आहे. दुसरीकडे, केंद्रीय आरोग्यमंत्री हर्षवर्धन यांनी राज्य सरकार हलगर्जीपणा करत असल्याचा आरोप केला आहे. त्यामुळे केंद्र आणि राज्यात वाद पेटला आहे.