तात्या लांडगे

सोलापूर : महाराष्ट्र इमारत व इतर बांधकाम कामगार कल्याणकारी मंडळाकडील नोंदणीकृत कामगाराचा नैसर्गिक मृत्यू झाल्यास त्याच्या कुटुंबीयांस तथा वारसाला दोन लाख रुपये मिळतात. याच संधीचा फायदा घेऊन एका व्यक्तीने पत्नी मयत झाल्याचे तर चार महिलांनी पती मरण पावल्याची बनावट मृत्युपत्रे काढून मदतीसाठी अर्ज केले. त्यातील तिघींना पैसेही मिळाले, पण त्यांचे बिंग फुटले आणि त्या पाच जणांविरुद्ध सोलापुरातील फौजदार चावडी पोलिस ठाण्यात शासनाची फसवणूक केल्याचा गुन्हा दाखल झाला आहे.

नोंदणीकृत बांधकाम कामगारास संसारोपयोगी साहित्य मिळते, त्यांच्या मुलांना शिष्यवृत्ती, शिक्षणासाठी अर्थसाहाय्य, कामगारास अपंगत्व आल्यास आर्थिक मदत, नैसर्गिक किंवा अपघाती मृत्यू झाल्यास वारसांना आर्थिक मदत, असे लाभ मिळतात. त्यामुळे अनेकांनी एजंटांच्या माध्यमातून बनावट कागदपत्रांद्वारे नोंदणी केली आहे. त्यावर काही संघटनांनी आक्षेप घेत चौकशीची मागणी देखील केली आहे. मागील वर्षभरात बांधकाम कामगारांमध्ये अचानक मोठी वाढ झाल्याचेही चित्र आहे. एजंटांना काही रक्कम दिल्यास बांधकाम कामगार म्हणून नोंदणी करण्यापासून सर्व लाभ मिळेपर्यंत सर्व कामे तेच करतात, अशी स्थिती आहे. त्यातूनच या पाच जणांनी बनावट मृत्यपत्रे देऊन फसवणूक केल्याचा पोलिसांना संशय आहे. सहायक पोलिस निरीक्षक विजय जाधव तपास करीत आहेत.

‘या’ पाच जणांवर गुन्हा, आता पुढे...

बनावट मृत्युपत्रे सादर करून शासनाची फसवणूक केल्याच्या प्रकरणात शोभा काशिनाथ वाघमारे (रा. सोहाळे, ता. मोहोळ), मनोज रतनलाल अवस्थी (रा. शामा नगर, मोदी), शैला सुरेश भांगे (रा. लक्ष्मी गल्ली, अक्कलकोट), सुनीता संजय कोळी (रा. मुकुंद नगर, भवानी पेठ, सोलापूर) व वैशाली नागनाथ जेऊरे (रा. कामगार वसाहत भाग-एक, सोलापूर) यांच्याविरूद्ध गुन्हा दाखल झाला आहे. संबंधितांना नोटीस बजावण्यात आल्या असून त्यांना पोलिस ठाण्यात बोलावून त्यांच्याकडे सखोल चौकशी केली जाणार आहे.

योजना नेमकी काय आहे?

महाराष्ट्र इमारत व इतर बांधकाम कामगार कल्याणकारी मंडळाच्या माध्यमातून नोंदणीकृत कामगारांसाठी विविध योजना आहेत. त्यात नोंदणीकृत कामगाराचा नैसर्गिक मृत्यू झाल्यास त्याच्या वारसाला दोन लाखांची मदत मिळते. त्यासाठी ऑनलाइन कागदपत्रे अपलोड करावी लागतात. मदत मिळविण्यासाठी संबंधित कामगाराचे स्थानिक स्वराज्य संस्थेकडील मृत्युपत्रे बंधनकारक आहे.

१५०० कोटींच्या भ्रष्टाचाराचा आरोप

महाराष्ट्र इमारत व इतर बांधकाम कामगार कल्याणकारी मंडळात सुमारे १५०० कोटींचा भ्रष्टाचार झाल्याचा संशय असून चौकशीसाठी राज्याचे विकास आयुक्त तुकाराम मुंढे यांच्या नेतृत्वाखाली संयुक्त समिती स्थापन करावी, अशी मागणी जिल्हाध्यक्ष बशीर अहमद यांनी केली आहे. मंडळाच्या माध्यान्ह भोजन, बांधकाम कामगार जनआरोग्य योजना, तपासणी ते उपचार योजना, माहिती पुस्तिका, सुरक्षा संच, गृह उपयोगी वस्तूसंच यामध्ये भ्रष्टाचार झाला आहे. सोमवारपर्यंत (ता. १४) स्वतंत्र समिती स्थापन करून करून सखोल चौकशी करावी, अन्यथा बुधवारपासून सोलापुरात आंदोलन करण्यात येईल, असा इशाराही अहमद यांनी दिला आहे.